హాఫ్ లాంగ్ కి.............. దూరంగా

ఎందుకు వొచ్చాను
పదునైన సూర్య నిశ్శబ్దంలోకి
..

ఉసుళ్ళు నిద్రపోయే చీకటికి
నేనెంత దూరంలో ఉన్నాను
..

కళ్ళల్లోకి తిరిగెళ్ళే ముళ్ల మాటలు
ఏమి చెప్పాయో మనసూ చెప్పదు
..

నమ్మకం లేదు
నీటితో
నీటిలో బతికే జీవుల మీద
..

కన్నీటిపై
కన్నీరు
ఎవరు చూస్తారులే
..

కీటకాల కాలం ఏమిటో
వాటి అరుపులు, నావి
ఎపుడు ఒక్కటవుతాయో
..

చరిత్రలేని చరిత్రకి
చరిత్రలేని మనుషలకే
చరిత్ర సుదీర్ఘంగా
..

ఏ కాయితపు బెజ్జంలోంచో
అక్షరాలు మాటలై పడిపోతాయి
వాటికై ఆకాశంలో యెక్కడని వెతకను
..

చలి చంద్రుడు
వెచ్చటి సూర్యుడికై
రాత్రంతా కలియతిరుగుతూ
..

కొండల పైన
కొండల కింద మనుషులే కానీ
మనిషిలో ఏ కొండ లేదు
..

సీతాకోక చిలుకా!
నీ నగ్నత్వాన్ని ఎవరికి చూపించావో చెప్పు
వారికి ప్రణమిల్లుతాను