అవతలి ఆవలింత

శూన్య అశబ్దంలో జ్వలించే
జననం మరణమంటావా

అన్ని ఎన్ని
రాత్రులులేని తలరాతల చావు
ఏమి చెప్పిందో విన్నావా

చూసే చప్పుడే జీవితం

స్మరణవాయువేదో నేత్రఛాయలో

భీతిల్లే ప్రేమే ఓ రహస్యవిషం

ఎన్ని గ్రాములు ఈ మరణవర్ణం
అవతలి ఆవలింతల బూడిద కన్నీటిలో

నిర్వాణబంధం

స్నేహితులే సరిహద్దులు 

మరణానికీ ద్రోహానికీ 

నిర్వాణబంధం అనేత్ర శబ్దంలో 

రోగశరీరమే శాపశాంతి 

చీకటిచితి నీడలు 

కాలపు కాలభైరవుడి మెడవొంపు రాత్రిలో 

పిట్టల గురక 

సరికొత్త కైవల్య అంగవైకల్యం 

మౌనం 

శూన్యస్వర్ణ గగనంలో ఓ సంభాషణ 

స్మృతుల పరాధీనతే 

శ్మశాన సన్మానం 

కొనవూపిరి చమురు కాళ్ళతో 

కనురెప్పల పడవలు 

స్నేహితుడా 

ఎక్కడ చనిపోయావ్ 

వరమివ్వు

కన్నీరే నిలవని కంటితో 

నిన్ను చూస్తే నన్ను క్షమించు 

నీరే నిలవని అలనై 

నీతో మాట్లాడితే నన్ను మన్నించు 

అడుగుజాడలులేని నా ప్రేమ 

నీతో ద్వేషిస్తే నన్ను మందలించు 

నిన్ను తాకే స్వర్గప్రేమ 

నాకు ప్రసాదించు