ఎడారి ముత్యాలు

రంగుల్ని సూచించే
గాలినీడ కిందో 
గాలినీడ పైనో 
రక్తపునీడ లోపల
రక్తపునీడ అవతల నువ్వే నీ నువ్వుతో

తీర్థవాసీ!
మాయాదేవి నేత్రాల్లోకి ప్రవేశించి
యేమి చూశావో
వోనమాల సర్పభాష నేర్చి
యేమి పలికావో
దుర్గంధాశ్రువులతో సిలసిల దుఃఖించి
యేమి కనుగొన్నావో
పకపక నవ్వి
ఎవరికైనా చెప్పావా

దురాత్ముడా!
చీకటి పెరుగుతోంది
చీకటి ఊడేలోగా నీలోని నువ్వులోకి చేరిపో
ఎడారి ముత్యాలు యేరుకోవాలిగా