ఎం. ఎస్. నాయుడు

లోలోపల

2012-01-23T09:55:00.003+05:30

ఒక సూది మనిద్దరిని
దేహభాష బంధాలతో కలిపి కుడుతోంది

బిలిబిలి నొప్పి అదృశ్యమైంది
పదాల నిశ్చేతనమే లోలోపల

నవ్విన కన్నీళ్ల కలలు వేనవేలు
వేవ్వేరు ఒంటరితనం

కలపలేనివి
కలిసి ఉండలేనివి
సూదికీ తెలుసేమో

నా లోపలి కుక్క నిద్రపోయింది

2012-01-09T13:03:00.003+05:30

ప్రతి ఆలోచనలో ఖాళీ అక్షరాలు
ఏది రాసినా మాటవ్వదు

మాటలతో ఆలోచించే మాటలు
నావద్ద లేవు

వొట్టి విడిచిపెట్టిన అక్షరాల్ని
కలిపి మాటల్ని చేయలేను

ముడుచుకుపోయే వాక్యాల్లో ఎన్నో ముడతల ముసుగులు
ఎంత తొలిచినా కనిపించని ఆలోచనలు

వింటున్నా ప్రతి చీకటిని
ప్రతి చీకటీ అద్దంలోకి చూడాలనే

ధన్యురాలు
శ్వాసించని పుష్పం

నీకు నేను తెలియదు
తెలియని నీకై నేను అని ఎప్పటికీ అద్దం అనదు

వెక్కిరింపు రక్తమే
వ్యాకరణ అనుమతి

ఉబ్బుతుండే నిశ్శబ్దం

చిల్లుల నీడై

గోడలన్నీ లోలోపలికి ముడుచుకుపోతూ
ప్రాంతాలన్నీ లోలోపలి బైటికి తెగిపడుతూ

ప్రతి అనుభవం ఓ ఖాళీ ప్రతిధ్వని

~~~

వివిధ, ఆంధ్రజ్యోతి, 09/01/2012

a fake dream

2012-01-03T19:30:00.002+05:30

మళ్లీ మునగాలి
వివర్ణవాయువు లోపల్లోకి

అతుక్కుంటూనే ఉండాలి
పగిలిన పదాల్లోని పదాల్నే

రక్తం చిందని మరణమౌనం
రంకిలేసుకుంటూ నాలోకి

ఆత్మహత్య చేయాలి

2011-12-20T19:22:00.002+05:30

చూసింది ఏదీ నిలవట్లేదు
నేత్రాలు హంతకులు

వినిందీ ఏదీ ఉండట్లేదు
చెవులు గాడిదలు

చదువుతున్నది ఏదీ ఎక్కట్లేదు
నాలుక ఓ పందికొక్కు

చేతులతో అలల్ని తాకాను
వాటి చేతులు నల్లగా పిలిచాయి

ఇష్టంలేని చోటునుంచి బయలుదేరాలి
జ్ఞాపకాల్ని ఆత్మహత్య చేసి

నా వంతు

2011-12-20T10:11:00.002+05:30

మెత్తటి గాలి పెంకులపై నడవాలి
నీరై రాలిపోయే చీకటికాంతిలోకి

ఘనీభవించే ధ్వనులతో
స్వప్నపుష్ప శిఖరాలు తరలిపోతున్నాయి

నిరీక్షనాకృతి ఏదీ కట్టెదుట లేదు
నిశ్వాస రెపరెపల్లో సొంతమైనదేదీ కనిపించదు

నా సహచరులతో ఇక్కడి కడలి విషపు ఆకాశంలో తేలుతున్న
కాకుల పాదముద్రల్నివెంబడిస్తూ పిచుకల మైధున రహస్యంకై అన్వేషిస్తున్నాం

ఆమె చేతుల్లోకి చేరాలని మేమందరం బట్టలు విప్పేసుకుని
ఎవరి తర్వాత ఎవరూ అని ఉవ్విల్లూరుతున్నాం

ఎవరికీ వినిపించలేదు ఎవరు పిలుస్తున్నారో
ఒకరి తర్వాత ఒకరు మాటలు అంతమయ్యే ఆకృతిలోకి

ఇక నా వంతు

చనిపోయే క్షణాల్లోకి

2011-12-17T11:03:00.000+05:30

ప్రతి దీవెన ఓ శాపం
ప్రతి దుఃఖం ఓ దీవెన

ఏది ఎపుడు కరుణిస్తుందో

నిర్ణయించే క్షమాపణలు
దయతో మిగిలే గాయాలు

అంగీకరించని అంగీకారాలే సెలవు చెప్పే నీడలు
ఆహ్వానించుకుంటాను నన్ను నేను పరిణితి లేని ఛాయల్లోకి

కఠినమైన కృతజ్ఞతలు

ప్రాణంలేని వీడుకోలు

మరోసారి చనిపోయే క్షణాల్లోకి
ఒంటరిగా నడుద్దాం

ఆకులపై ఆకాశం

2011-12-15T20:32:00.003+05:30

నీరు నిండిన అలలో
మునిగి తేలుతున్న ఆకులు

ఆకుల్లోని నీరు ఎటు వెళ్లిందో
ఎక్కడికి చేరిందో

ఆకులపై ఆకాశం కనిపిస్తోంది
కొన్ని మబ్బులు దారితప్పాయి

కీటకాలకీ దక్కని ఆకులు

ఓ సుఖవాంఛ

2011-12-15T12:04:00.004+05:30

సహజమైనదేదీ మానవ కల్పితం కాదు
పునరావృతమయ్యే మరణమే జీవించటం
విషాదం ఓ సుఖవాంఛ
భీతే ఓ సాహసరుగ్మత
సౌందర్యం ఓ అసౌందర్యాన్ని ప్రేమించటం
పరిచయమయ్యే ప్రతిదీ ఓ శిధిలజ్ఞాపకమే
నిర్వచిస్తున్నాను ఇవీ అబద్ధాలని
స్వేచ్ఛ ఓ అసహజమైన విషం
నమ్మిక ఓ పురాతన హత్య
పరాయి మౌనంలోకి ఎన్నటికీ ప్రవేశించలేను

అతృప్తి

2011-12-14T09:09:00.001+05:30

. యీ మాట్లాడే చేతివ్రాత మాటలు ఇప్పటికీ అంతుచిక్కటం లేదు
. అవే ఎప్పటికీ దేనికీ ఎదురుచూడవు
. అవి తాకినా చలించిపోయే చర్మమే నాకైతే లేదు
. వాటి ఆలోచనల్లోకి ఆలోచనలు ఎలా వొస్తాయో
. ఇదంతా భాషే అని ఎంత గింజుకున్నా నమ్మలేకున్నా
. ఐతే వాటినే అనుసరిస్తున్నా అనుకరిస్తున్నా అంగీకరించలేకపోతున్నా
. పొతే చనిపోతే యీ మాటల్లోకి మాటలై అంతరించే మాటల్తోనే అంతరించాలి
. అమాటల సెలవు అతృప్తి సెలవు

చెత్త కుండీ నాలుక

2011-12-13T09:06:00.002+05:30

ఒక గదిలో నాలుక అటూ ఇటూ తిరుగుతోంది. తనకేదో జబ్బుజేసిందని అద్దంలోకి తొంగిచూసుకుంది. రోజంతా చూసుకుంటూనే ఉంది. అద్దానికి చూసిందే చూసి కోపమొచ్చింది. ఒసేయ్ నాలుకా, నీ అందం పాడుగాను, నీకే రోగం లేదు. నన్ను, నా నిద్రను తెగ చెడగొడుతున్నావు. నీకేమైనా పిచ్చా. నా ముందుకొచ్చి గోల గోల చేస్తున్నావు. నీ కంపు భరించలేకపోతున్నా. నీ అవతారం, నీ నవ్వులు పరమ వికృతంగా తగలడ్డాయి. ఎటన్నా పోయి తగలడు. నా ముందుకు మళ్లీ రాకు. వచ్చావో నా అసలు సిసలు రూపం చూపెడతా. చెత్త కుండీ నాలుక. దరిద్రగొట్టు నాలుక. ఆ గదిలోంచి నాలుక బైటికి రావాలి. ఎవరు తీసుకొస్తారు.

జీవితం దేన్నీ ప్రేమించదు

2011-12-12T11:21:00.002+05:30

ఆ చివరి కలకోరిక తీరనేలేదు. ఆ కోరికకల చివర తీరినఖాళీ. తీరాల్సినఅనుభవాలే ఎపుడూ లేవు. లేనిఅనుభవాల్లోంచే దేన్నో ప్రేమిస్తాం. లేని ఆలోచనల్లోంచే దేన్నో ప్రేమిస్తాం పొందామని. సోదిచెప్పే మాటల్లో మాటల సొద మిగిలిపోతోంది. పిట్టలుఏడ్చినా వినలేని జన్మ. నకలు కలలే ఇప్పటికీ. నకిలీ కలలే మాటిమాటికీ. మాటమాటకీ నకిలీ మాటలే. ధ్వని ఒకవిధ్వంసం. ఒక ఆత్మహత్య. స్పర్శ ఒక హత్య. ఎవరి నిశ్శబ్దంలోనో మనం పలకరించుకుంటాం. పలికే నిశ్శబ్దమే ఓ అద్దం. అడ్డమయ్యే అబద్ధాలే న్యాయ యంత్రాలు. తార్కిక దుఃఖం మరో స్నేహద్రోహం. క్రీనీడ శబ్దాల్లో నేత్రహృదయం. దొరకదు నిష్క్రమించే దుఃఖద్వారం. ఏ ఒక్క ఒంటరి జ్ఞాపకమూ లేదిపుడు. జీవితం ఓ అభిప్రాయమే. కొన్ని పదాలతో.

చీకటి హరివిల్లు

2011-12-10T10:00:00.000+05:30

ఆలస్యమైంది

ఏదో ఒకటి వెంటే ఉంటుంది వెంటాడుతూ

సూర్యుడో చంద్రుడో నీ లోపలే వెతుక్కోవాలి
భూమి మూసిన పూలు నీ లోపలే తెరుచుకోవాలి

ఉప్పటి చేతులతో పిట్ట ఎగిరే ఆకాశాన్నే అడగాలి
నీకో చిన్న ఆకాశాన్ని తెంచి ఇవ్వమని

ఖనిజాలకి ఊపిరిచ్చిన గాలినే కోరాలి
నీకో చీకటి హరివిల్లుని తెరిచివ్వమని

ఆలస్యమైంది ప్రతిదీ
నీ వద్దే కుక్కపిల్లై

నా లోపల నీకై

2011-12-08T10:14:00.001+05:30

ఇది ఏది చెప్పాలనుకుందో అదే చెప్పదు
ఎపుడూ ఏదో చెప్పే అర్థాలే చెప్పకుండాలనే ఇది

ఏ ఎటువంటి భావమూ తట్టదు
వాక్యాల్లోపలే ఉండే మాటలతో

అదేదో ఉందనుకునేలోపే
మోస్తున్న మాసిన మౌనమే రోతై

ఎక్కడో మొదలయ్యే అంతిమ విరామ
విశాల వికార వికృత వైరుధ్యం

ఎప్పటి దృశ్యమో ఎదురుపడుతుంది
చదవాలని అనుకునే అనుకోవటం

ఇంతకూ
ఎవరో చదివిన చూపుల్లోంచి ఏదైనా కనిపిస్తుందా

ఒకోసారి ఒకానొక నొప్పే తలకిందులైతే
విసర్గ సుఖమేదో రహస్యమౌతుంది

తెరవని గాలి ఆకుల్లోకి
తెరిచిన జ్ఞాపకాల వ్యత్యాసాలు

ఇదీ
విన్నావా

ఇదే
నా లోపల నీకై గొణుక్కుంటూ

భవిష్యత్తులేని వ్యాకరణం

2011-12-07T08:51:00.000+05:30

ఏదో నీడ
వెన్నంటే, ఎవరు పంపారో

నీడలోకి లాక్కెళ్ళే నన్ను
నీడలోంచి బయటికి వస్తే అది ఏమౌతుంది

నీడలు ఏ భాషలో
ఏమి చెపుతాయో తెలిసేదెప్పుడు

భవిష్యత్తులేని వ్యాకరణం
ఈ జీవితం

జీవించి ఉంటేనే ఏ నీడైనా

సొంత చీకటి

2011-12-03T09:19:00.001+05:30

ఏదో సొంత వింత చీకటి

చెట్లు పెరుగుతుండే సముద్రపు చీకటిలో
నీ వంక నువ్వు చూసుకుంటావు

ఎన్నో వస్తువుల మధ్య మరో వస్తువు
నీలోకి చూసుకుంటావు

మాటలన్నీ మాగిపోయాక
ఆగిపోయాక నీతో మాట్లాడాలని అనుకుంటావు

ఏదో చీకటి వింత
నిన్ను నువ్వు వినాలనుకుంటావు

ఏదో
చీకటై చితికి

ఎక్కడో ఏ యాత్రికుడో
నీలానే రాత్రి సముద్రం వైపు నడుస్తూ ఉండొచ్చు

చూడకు

2011-12-01T08:58:00.001+05:30

ఆకుల్ని తననుంచి వొదులు కొంటుంటే
వృధా అని అనుకోలేదు చెట్టు

సంతోషపడే నిర్ణయాలు సంతోషపెట్టే అనిర్ణయాలు
రవ్వంత తేడాతో సృతిమించుతాయి

దాగున్న కన్నీటికి కన్నెప్పటికీ దూరమే
దాచిన పదాల్లో మౌనాన్ని వెతకాలి

అదృశ్యమయ్యే లోతుల్లోంచి ఏది విన్నా
మరికొన్ని సూర్యోదయాలు మిగిలే ఉంటాయి

చూడకు
ఓ అపరచితుడి శవం దేహమై నీ పక్కనే ఉండొచ్చు

((( మీది కాదులే )))

2011-11-21T18:42:00.000+05:30

చెరిపేయాలి చెలియకీ తెలియని సూర్యుడిని. చేరవేయాలి మాటలనే మాటల్లోకి. ఆమెతో మాటల ఆట ఆడకూడదు. మాట్లాడకూడదు. సిద్ధాంతాల్ని విషపు పురుగులు తింటాయి. చల్లటి పిట్టలు పురుగుల్నే తింటాయి. చీకటి మూతుల ముద్దుల్లో శవాలు నవ్వుతాయి. గుర్తుపట్టలేని చెట్లు, కలలు, బావుల్లోకి దూకుతాయి. అలవాటో, అనుభవమో తెగుతున్న ప్రార్ధనలో ప్రభావాలే పురుడోసుకుంటున్నా, ముదిరిన ప్రవచనాలలో శూన్య రంధ్రం. నీటి గాలి తేలదు కళ్లపై. తెలియని మనసు అడుగుల్లో అడుగులేసుకుని ఎక్కడికని, ఎందుకని. అంధకౌగిలేదో సంభాషిస్తూ శరీరాన్ని దాటుతూ. నేలపెదవిపై ఎవరో మూర్ఛద్వేషాన్ని నాటారు. అంతమవ్వదు ఇపుడే వస్తున్న జ్ఞాపకం. చీకటి వాసన. మరణాన్ని చీల్చే మాటల్లోకి మాటల్నే మార్చాలి. ఏమార్చాలి. ఇసుకలో సూర్యుడ్ని దాచాను. ఏ రాత్రీ మీది కాదిక.

~ఇంకా పూర్తికాలేదు~

2011-11-09T21:04:00.000+05:30

కళ్లకి సాక్ష్యాలు దొరకవు. తెరిచిన తలుపుల్నే భుజాలపై మోసుకుని లోపలికి బయటకి. సరిపోదు ఈ రాత్రీ, కన్నీళ్ళని లెక్కించాలంటే. కలలు కలల్ని ఊసేస్తాయి. కంటిలో చిరిగిన ఆలోచలని కుడుతున్న మౌనానికీ చెప్పవు నీ అబద్ధం. నిశ్శబ్దం తర్వాత ఏ రహదారిలోనో వీడ్కోలు. ఇల్లు ఎందరికి ఉంటుంది సముద్రమై. ఎడారి చీకటే అందులో. గద్ద గూటిలోని గోడు ఎవరికి చెప్పాలిలే. మిణుగురుల సంతకాల్ని అనుకరించాలి. తేడా తేడా. నీడ నీడకీ. కన్నీటికీ, కన్నీటికీ. యంత్రాలే అత్యాచారం చేస్తున్నాయి. ఆగిపోయే సముద్రనదుల్నీ, మనిషి ఎముకల్నీ, తిరిగి తిరిగి దర్శించుకోవాలి. నవ్వే పేదలు, నవ్వే పెదాలు ఎవరు చూసారులే. అసహ్యహించుకునే మాటలేవో ప్రతి వొంటిలో. ఆ అసహ్యరహస్యం అందరిలో దాగుందా. రెండు సమాధులు ఈ వొళ్ళంతా. ఆనందం ఆనందంతో ఎపుడైనా ఉందా. కళ్ళని, కన్నీళ్ళని తెరిచే మనసుని చూసింది ఎవరు. దొరకని దొంగతనమే దైవత్వం. నిన్నటి వర్షం ఇంకా ఏ కనులలోనో. కొందరికే సత్యమే అసంతృప్తి. నా అంత్యక్రియలు ఇంకా పూర్తికాలేదు. నమ్మించే గాలి, నీరై, ఏ పూవుల అంచుల్లోనో. ఖాళీ పుష్పాలు. ఖాళీ సమాధులు. ఖాళీ నేత్రాలు.

నన్ను తీసుకెళ్ళు

2011-11-07T19:27:00.003+05:30

పక్షి రెక్కలు
భూమిపై

భూమి
పక్షిపై

ఆకాశం
ఓ సమాధి

ఏ గొంతులోనో
పిట్టగూడు

చనిపోతాను
కొన్ని మాటల రెక్కలపై

గాలీ
నీ నిద్రలోకి నన్ను తీసుకెళ్ళు

ఎలుక నాలుక

2011-11-03T17:46:00.001+05:30

ఒక వెర్రితనాన్ని
ఇక్కడ ఉంచాను

అది పెరిగిందో
లేదో రోజూ వచ్చి చూస్తాను

ఒకోసారి ఇక్కడేదీ కనిపించదు
ఒకోసారి ఇక్కడేదో ఉన్నట్టు

నీడలపై నీడల అనుకరణ
అనుసరించే పదాల నీడలు

వెర్రితనం ఎవరికి తెలియాలిలే

రహస్యమోక్షం అందులోఉంటేగా

ఏడుపులు కలలో
వెర్రితనందేమో

తనకీ నాకూ మధ్య
ఓ మేఘమే అడ్డు

తొంగిచూడలేను
సూర్యుడిలోకి

ఎలుక నాలుక
నా కంటిలో తిరుగుతోంది

ఒక మనిషి... మరో పిట్టా... ఇంకో చెట్టూ

2011-10-31T18:43:00.004+05:30

1
ఎవరో చెవులతో నివసిస్తున్నారు
ద్వారబంధాలు కూలిన అక్షరాల్లో

కూడలి గోడల
కుంగిన ఓడల మధ్య
విలాసాలను
కూడబలుక్కుంటున్నారింకెవ్వరో

విలాస పదాలే విశాలంగా లేవు
మనసే కదలదు
ఏ పదాల్లోనైనా
తిరిగి చూసే భవిష్యత్తే
గతమై అందరి ముందూ

2
ముందుకు రాని కాలం
తొడుక్కోలేని
నీ స్కూలు నిక్కరు చొక్కా

దరి చేరవు నిశ్శబ్దాలు
ఉదయాలే భయానక మౌనం

ఊపిరి ఊహలే
ఊగిసలాడే ఊలు ఊళలు

సరిపడదు ఏ సలుపూ
సరి తూగదు ఏ మలుపూ

3
చేజారే అద్దాల్లోపల
అద్దంకై వెతకాలి
చూపు మరో నేల కంటిపై

అపుడు తెరెస్తుంది
నిదురపోయే ఆకసానికీ
నిద్ర లేపే రెప్పలకీ
మధ్య ఒక చూపు

అద్దం డంబమనీ
అర్థం దాని బింబమనీ

కనుబొమన కడుతుంది
నేలా ఆనని చూపొకటి

మిణుగురుల మెరవణి నడుమ
కొనమొనతేలి నడక సాగని
ఏరుల తేరు

ఏమయ్యిందీ పాడు లోకానికి
తిరనాల జీవితాన్ని
పంచదెందుకు తలా ఇంత

4
పంచుకునే పతనమేదో
మహోన్నతం ప్రతి నిశ్శబ్దంలో

దరి ఎవరున్నారో
దవ్వున ఎవరు చేరారో
చూడలేని పతన మైత్రది

పవళింపు రాగమే మరో శోకం
ఎవరు నిద్రించారులే ఏ కలలోనైనా

ఎక్కడికి చేరామో
ఎవరికోసమో చేరేది
ఎక్కడెక్కడికో

ఎవరు చెబుతారో
వారి నాలుకపై ఉమ్మివేయండి
వారి ఉమ్మితో కన్నీళ్ళని కడగండి
మరో పిట్ట నాలుక కింద
(కొంచెం నీడ చూపించండి
కొంత నిద్ర పోయే సూర్యుడి కోసమే
జీవించే ఆశని దరి చేర్చండి)

5
తెలవారే
ఓ చెట్టుతో
చెప్పాపెట్టకుండా వెళిపోయింది ఆ పిట్ట
అపరిచితలే చెట్టూ పిట్టా

నడి ఎండలో
బడాయిపోతూ
చెట్టును బులిపించింది పిట్ట

"అతిథీ నీ పేరేంటి?"
పిట్టను అడిగింది చెట్టు

ఎగురుతూ విడిపోతూ
రెట్టిస్తూ వెళిపోతూ
చెట్టుపై రెట్ట వేసి చెప్పింది పిట్ట తన పేరు
"పాట"

సాయం సంజెలో
వాలింది మళ్ళీ పిట్ట
రెమ్మల నీడల చీకటిలో
రెక్కలు ముడుచుకుంది చలిలో
దాచుకుంది బిక్కచచ్చి

హోరుగాలిలో
కొమ్మలు అల్లాడుతుంటే
రెమ్మలు చెల్లాచెదురవుతుంటే
బెంగగా పిలిచింది పిట్టని చెట్టు
"పాటా"

పిట్ట పలకలేదు
చెట్టు నిదుర పోలేదు ఇంకా.

6
మరలిన మౌనపు మాటలకేం తెలుసులే
మాసిన మోసపు మూస మూతల మోహాలు
ఖండిత జ్ఞాపకాలే
రేపటి జ్ఞాపికలు

ఎటో చేరిన చెట్టులో
ఏ కొమ్మ ఏ పిట్టదో
ఎవరకి మాత్రం తెలుసు
పదాల పెదాల్లోని కీటకాలుల
ఏ పిట్ట నోటికో
ఎప్పటికీ చెప్పొద్దు
కలలోని కీటకాల్నీ తినే పిట్టని చూడాలి
పిట్టల్ని తినే స్వప్నాన్ని చూడాలి
స్వప్నాల్ని ఆరగించే మనుషులే
ఇప్పుడు లేరు
ఇక పుట్టరు

7
మనిషి వెతుకుతున్నాడు
ఎడారిలో పిట్టను

పిట్ట నిరీక్షిస్తోంది
నింగిలో మనిషి పాదముద్రల కోసం

చెట్టు కనుల కాయలుకాసింది
వాలే పిట్ట ఆనవాలుకు

*
- అనంతు
ఎం ఎంస్ నాయుడు

జాలరి

2011-10-28T18:26:00.001+05:30

ఏదీ నమ్మవు
దేన్నీ నమ్మాలనుకోవు
నమ్మకమూ అమ్మకమేనంటావా

వ్యాకరణం వాయువై కదలదు
వార్ధక్యం ఆయువై నిలవదు
స్నేహం ప్రేమై తిరిగి రాదు

ఎక్కడో నమ్మకం పువ్వులై పగిలిపోతుంది
ఎక్కడో పగిలిన పువ్వుల్లో నమ్మకం గుచ్చుకుంటుంది
అదేదీ కాదులే
నమ్మకం నీ పదాలపై తిరుగాడే అసహ్యం

చూసే ప్రతీదీ
కొంత నీలో మరికొంత బయట తగలబడుతూ మసైపోతూ

తలూపుతూ అద్దాలు నీలోకి
తలాడిస్తూ నీవు అద్దాలలోకి

నమ్మకమే దాగి ఉండదు ఎక్కడా
దాచుకో దాచుకో దాపరికం లేకుండా

కలల్ని కడగాలి

2011-10-27T22:00:00.002+05:30

అతను అతనితో మాట్లాడుతూనే మాట్లాడలేదు
యేవో కొన్ని అంటే కొన్నే స్వల్పమైన అల్పమైన మాటలు

అతను అతనితో వింటూనే వినటం లేదు
యేవో కొన్ని సులువైన సలుపుపెట్టే మాటలనే మాటల్ని చేసి వింటంలేదు

నల్లటి జెండాలు ఎర్రటి జెండాలు తెల్లటి జెండాలు
కింద
చెట్టు
చెట్టుకింద
పావురాలు వాటి రంగుల్లో

అతను పావురాల కళ్ళల్లోని మాటల్ని చూస్తున్నాడు
అతని అతను పావురాల మాటల్లోని కళ్ళని వింటున్నాడు

అతని సోదరి ముద్దుపెట్టుకున్న జ్ఞాపకం
జ్ఞాపకం ముద్దుపెట్టుకున్న అతను సోదరి

తండ్రి
తల్లి లేని నేరాల చీకటి

తల్లి
తండ్రి లేని చీకటి
ఏవేవో ఎవరెవరో ఉంటూ ఉండని చీకటి

ఇక్కడేదీ ఉండదు
చివరి చివరి చివరి వీడ్కోలూనూ

అతను అతను
అతని అతను
తను అవ్వలేని అతను
అతనే అవ్వలేని తను

మాటలు మొహాలు
ఒకేలా అనామకం

ఈతలో ఈతకి వెళ్లి ఈదుతూ కల
కలలో ఈదుతూ ఈతకి వెళ్ళాలి
మునగా లేదు తేలా లేదు
ఈత రాలేదు
అసలు ఈతే లేదేమో

కడగాలి
మాట్లాడే చెవుల్ని
కలల మాటల్ని

లోహానందం

2011-10-19T18:24:00.000+05:30

లోహజిహ్వలు

లోహవిషాదాలు

ఎన్నో రంగుల్లో
ఎన్నో నీడలపై
కలిసే
కలలు

లోహస్నేహితులు
లోహప్రేమికులు

ఎన్నో నీడల్లో
ఎన్నో రంగులై
మరిచే
పిట్టలు

మత్తు పదార్థాల్లారా
గిరగిరా మీరూ నేనున్నూ

పిట్టలు మార్చిన
కలల్లోకే
రంగులయ్యే
నీడలు

లోహనిశ్శబ్దం
లోహానందం

బట్టల్లేని మాటలు
రెల్లుగడ్డి చాటున
ఏ రెక్కల్లేని పిట్టో
రాత్రి దారిని చూపిస్తుంది

లోహనేత్రాల్లో
మునిగిపోయాను

ప్రతిబింబంలో అద్దం

2011-10-15T20:45:00.003+05:30

ఊహించింది ఉండట్లేదు

ఉండేదేదో ఊహకీ తెలియదు

తెలియని ఊహలే ఉన్నట్లు

అనుకున్నాను నిన్నే చూస్తూ చూస్తూ

చెదరగొట్టకు బెదిరిపోకు

నా ముఖం నీ ముఖంలో

చేరావా నీలోకైనా

2011-10-14T13:30:00.004+05:30

తలెత్తినా తలదిన్చినా
కనిపించే ఖాళీ స్పర్శ ఛాయ

ఏ దరీలేని ఎదలో
స్నేహమే స్పర్శ వృత్తం

చినుకు చప్పుడు కునుకు చప్పుడు
ఏ కల నడకో

ఆకలితో అద్దం అద్దంలో ఆకలి
ఎవర్నో మింగాలని ఎవరో మిగలాలని

దేహమేలేని దేశంలో ఉంటే
పౌరహక్కులు ఏ మూలకు

నియమమే సమంజసమనే నియంతకీ
లేదు ఏ ఉదాహరణ

చేరాల్సిన విరామ చిహ్నమేదో తప్పిపోయినప్పుడే
గగుర్పాటు ఓదార్పు ఏకకాలంలో

చీకటి చప్పుడు నమ్మిన బాంధవ్యం
ఏ తుది వయసో

చేరావా
నీ నిద్రలోకైనా

మాయా సమయం

2011-10-11T20:24:00.003+05:30

పదానికి పదమేది

ఇదని

ఇదేనని

అనుకున్న ఆనుకున్న పదమేది

తెరిచేది ఎక్కడుందో

తెలియని ముగింపుకై

నీరు తెరుచుకుంటుంది

మునిగేది ఎక్కడో

తీసుకోవాలి

తట్టలేని ప్రతి ఆలోచననీ

చేతుల్ని తెగ్గోసుకోవాలి

మనసులోనే

అనుభవమే

అనుభవిస్తోందా

మాయా సమయం

సమసిపోదే

వాసనతోనే రాత్రిని

మర్చిపోవాలి

అద్దం ~ కిటికీ

2011-10-04T19:02:00.005+05:30

మనమిద్దరం

తొంగిచూసేవాళ్ళమే

దేనిని చూసామో

గుర్తుకుంచుకోము

దేనిని చూడాలో

ఎప్పటికీ తెలియదు

మనమిద్దరం

ఎదురుచూసేది దేనికోసం

మౌనంలోకి అరవాలి

2011-09-28T20:06:00.001+05:30

ఒకోసారి
ఏ బాధనో దుఃఖంలోకి తీసుకెళ్లటం మంచిదేమో
తోసుకునే నల్లటి చేదు వలయాలు గుండెనిండా నిండినపుడు

ఒకోసారి
ఏ చీకటిచితిలోని తెల్లటిగాలిలోనో మిగిలిపోవాలి
బిగదీసుకునే చల్లటి కెరటాలు కంటిలోకి వెళ్లనపుడు

ఒకోసారి
ఏ రంగులూలేని మోసపు ఆత్మీయతకు బలవ్వాలి
ద్రోహపుకాంతి జ్ఞానాన్నీ వెంబడించే అజ్ఞాతహృదయంలోంచి

ఒకోసారి
పిట్టల కన్నీరులోకి
పిల్లల కన్నీరులోకి మరొక కళ్ళతో చూడాల్సిందే

ఒకోసారి
బిగ్గరగా మౌనంలోకి అరవాలి
మాటలన్నీ ఏ ఒక్క దృశ్యమూ కాకుండా

ఒకోసారి
కలలు స్త్రీలు స్నేహితులు రాచపుండ్లు

డిస్కౌంట్లో అంత్యక్రియలు

2011-09-27T13:50:00.000+05:30

ఇక్కడే
ఈ రోజే ఉచితంగా
మీ రచనలు చదవబడును
మీ జ్ఞానార్జిత సంపదను దొంగిలించబడును
ఫ్రీ ఫ్రీ ఫ్రీగా తీసుకోండి తిరిగి మీ జ్ఞానాన్నే
జ్ఞానవంతులు కావాలని ఆశించండి

ఇక్కడే మరెక్కడా కాదు
డిస్కౌంట్లో దొరికే ఆలోచనలు కొనబడను
డిస్కౌంట్లో ఫ్రెష్ ప్రేమలు అమ్మబడును
డిస్కౌంట్లో ట్రాష్ రచనలు వినిపించబడును
డిస్కౌంట్లో ఫార్స్ సినిమాలు చూపబడును

డిస్కౌంట్లో క్షమాపణలు
డిస్కౌంట్లో అంత్యక్రియలు
డిస్కౌంట్లోకన్నీళ్లు అమ్మబడును

వొచ్చారా
డిస్కౌంట్ పొందండి
పీల్చే గాలిలో నీటిలో నిప్పులో చీకట్లో

నకిలీ సమాచారం

2011-09-26T10:53:00.002+05:30

అసమగ్ర సమాచారం

దేహంలో కొన్ని మొక్కలు
దేహంలో కొన్ని కిటికీలు
జిగురు, అద్దాలు ఎండిపోవొచ్చు పగిలిపోవొచ్చు

సమగ్ర సమాచారం

మొక్కల దేహంలో
కిటికీల దేహంలో
పగిలిపోయే ఎండిపోయే అద్దాలు జిగురు లేకపోవొచ్చు

ఆచార సమాచారం

భవిష్యత్తులో ఒక్క మృత్యువే నీకూ తెలియకుండా
మృత్యువులో ఒక భవిష్యత్తే నీకూ తెలియకుండా

నకిలీ సమాచారం

ప్రేమించే కన్నీళ్లే శాస్వతం
రమించే జీవితమే శాస్వతం
కామించే మరణమే శాస్వతం
పూజించే భక్తే శాస్వతం

సమాచారం

బానిసలం
బానిసలకి బానిసలం

మనసు

2011-09-24T22:26:00.000+05:30

నీ ప్రార్థనకై
పూరేకులన్నీ చేతులు జోడించాయి
అప్రయత్నంగానే

నీ స్నేహానికై
చినుకులన్నీ రెక్కలు విప్పాయి
అప్రయత్నంగానే

ప్రతిచోట నీ శ్వాస
అడుగుజాడలే

ఈదులాడే కాలం
సూర్యచంద్రులని చేరటం లేదు

ప్రేమించే కొమ్మలకే
నీడలు తెలుసు

స్నేహితుని స్థలం

2011-09-23T08:58:00.000+05:30

సొంత ముఖాన్నే చూసే అయిష్టత

తర్ఫీదులేని అద్దం

ఎన్నో గొంతుకలతో దృశ్యశబ్దాల్ని దాటాలి

నిరీక్షించే సంస్పర్శల మజిలీకై ప్రయాణించాలి

ప్రతిదీ శూన్య వీడ్కోలే

కృతజ్ఞతలు చెప్పేసేయ్ అందరికీ, సమాధీ!

తలిదండ్రులులేని స్వప్నాలు

2011-09-21T22:34:00.000+05:30

నీ బయట
రాత్రి ఎదురుచూస్తోంది

నిలకడలేని నీడలనీ
కడలి ఒడిలో దాచే పౌర్ణమి

చెట్లపై చీకటి కొమ్మలకీ తెలుసు
చీకటి నీటిలోని చీకటే నీరుకి తెలుసా

వినిపించే నీ బయట
రాత్రి ఎదురుచూస్తోంది

నీ లోపల పెరుగుతోంది
ఒక సన్నటి ఖాళీ పుష్పం

అందుకోవు
తెంపుకోలేవు

తలిదండ్రులులేని స్వప్నాలు
నీ బయట ఎదురుచూస్తున్నాయి

ప్రతిధ్వని ధ్వనినే వినాలనుకున్నావా
ప్రతిబింబ బింబాన్నే చూడాలనుకున్నావా

అదృశ్యమయ్యే
దృశ్యం నీ బయట ఎదురుచూస్తోంది

వెళ్ళావా

ఉయ్యాల నీడల్లో

2011-09-20T14:17:00.001+05:30

సిగ్గుపడే
సిగ్గుపడకుండా నా చేతుల్ని కళ్ళని కాళ్ళని నీకు చూపెడతాను
ఎందుకు చూపానో నీకు అర్థమవ్వదు ఎన్నటికీ

ఆకుపచ్చటి చీకటికై
చీకటిలోకి మరలే తెల్లటి చేతుల్ని చాపే చావుకి
నా శరీరాన్ని ఎరువివ్వలేను

పల్చటి నీటి రెక్కలతో బంధించే బాధలకై
వెలుగుని నమిలే వెలుగులో విడిది చేయాలి
నా శరీరాన్నే ఎరువిస్తాను

బరువు రెక్కలతో ఎగిరే పిట్టకి ఆకాశం చులకన
చులకనగా చూసే పిట్టకళ్ళకి ఆకాశం బరువే

రేపటి కెరటాల్లో నిద్రించే సముద్రంలోకి జారుకునే ప్రతి ప్రాణీ
కొన్ని అతుకుల ఇటుకుల ఉయ్యాల నీడల్లో

అతనికీ తెలుసు
ఆమెకై ఎవరూ లేరని
ఆమెకీ తెలుసు
అతనికి తనూ లేదని

తుడుచుకుపోయే కన్నీళ్లే ప్రతి అల తీరం చెంపపై
తీరంలో మన పాదముద్రలు మనకన్నా ముందు నడుస్తుంటాయి

చూసే సిగ్గే
సిగ్గు
సిగ్గుపడకుండా నా దేహాన్నీ ఎత్తుకుంటాను

నన్నే నా దేహం ఎత్తుకోకపోయినా ----

ఎత్తుకునే నా చేతుల్లో
ఎత్తుకునే నా నేత్రాల్లో
ఎత్తుకునే నా కాళ్లో
ఎత్తుకునే నా స్వప్నాల్
ఎత్తుకునే నా మరణాల్
చాలు చాలు చాలు

సూర్యసుఖమేదో
ఈ భూమికే తెలుసు

నాకెందుకులే

పుల్లటి నిశ్శబ్దం

2011-09-19T22:28:00.001+05:30

ఎవరికి దొరికిందో పిచ్చి నిశ్శబ్దం
ఎవరి చేతిలోనో నిశ్శబ్దం పిచ్చిదైంది
పిచ్చి చేతులో
పిచ్చి మాటలో ఎవరికో దొరికాయి

అందరూ పదిలంగానే
పదిలం ప్రతి నీడా

ప్రఖ్యాతి వీరుడా రా
వీరుడా ఖ్యాతితో రా
మరణంతోనైనా స్వప్నించు

పిచ్చి చావు
చావు పిచ్చి

పదిలం
పదాలే పదిలం

పుల్లటి నిశ్శబ్దం
పుల్లటి పిచ్చి

బాహ్య అంతర్మధనం

2011-09-12T18:54:00.003+05:30

// ఏది సత్యమో అది జ్ఞానానికి బహు దూరం

నేత్రాలూ సమాధులే

సౌందర్యం బాహ్య అంతర్మధనం

ఏది అసత్యమో అది నిజమా

ప్రవహించే శోకంలో ఈదటమో మునగటమో

తన నిద్రని తానెప్పుడు చూసుకుంటాడు

ఒంటరి ఆకాశంలో ఒంటరి సముద్రం

అద్దంలో ఎవర్నీ చూడకపోతేనే అర్థం

ఖాళీ నేత్రమో, జిహ్వో, అధరమో ఎప్పటికీ ఆధారాలు కాలేవు

ఓ ముసలి పసి దుఃఖం సంభాషించే జ్ఞాపకమే

అందరిలో ఓ మరలిపోయే దూరం అతి దగ్గరగా

పుట్టినరోజులో తారీఖు లేదు

నిండు పుండు చావు

బతికే ఉన్న కళ్ళ వెనకే కన్నీళ్లు లేవు

మరణమే సూర్యుడి ఊపిరి

శాంత శిశ్న శివ స్మశానం

హృదయం నిర్గుణం

సమరం సమయం

సంఘంలో ప్రతి దృశ్యం శూన్య శత్రువు

ఊరించే ప్రతిదీ ఊరదు ఎప్పటికీ

ఊపిరిలో గాలి ఎవర్ని చూసింది

వెదురు నేత్రంలో శూన్య స్ప్రహ స్పర్శ మోక్షం

అనామక ఆకృతి అదృశ్యంలో

దృశ్యంలో నేత్రం ఎప్పటికీ లేదు

ముఖమే మారణహోమం

బాల్యం ఎక్కడో, మరెక్కడో ఎప్పటికీ కనిపించదు

తలుపుల్లోకి తపస్సు చేయలేని తలపుల నిశ్శబ్దం

పూలపై నిద్రించే దేహం రేపటికి లేదు //

ఈ కవితకి అనువాదం మీ నుంచి కోరుతున్నాను. సహకరిస్తారా?

2011-09-11T03:30:00.003+05:30

If I became a stone

If I became
a stone

stone would become
lotus

lotus,
lake

and if I became
a lake

lake would become
lotus

lotus,
stone.

చల్లటి రంగు నల్లన

2011-09-09T12:31:00.000+05:30

చూడు

పదాలుండని మాటలేవో

విను

చేపల కలల్ని

చూడకు

రాళ్ల అలలని

వినకు

బంధించే కాలాన్ని

చీమలు కంటిలో

లేదు

2011-09-09T01:56:00.000+05:30

ఉంపుడుకత్తె
సూర్యుడే
ఎప్పటికీ

కొన్నిసార్లు నీటి అద్దాలు ఖాళీగా ఎగురుతాయి మాటల్ల్లో

పిర్రల మబ్బులు
కళ్ళల్లోని నీటి చంద్రుడ్ని
నీటి సూర్యుడ్ని
ఓ
దుప్పటి గాలిలో
అటూ ఎటో
తిప్పుకునే
హృదయంలో ఉంచినా దొరకదు ఆకాశం

నీ ముందే ఉండే ఖాళీ పదం
నా ముందే ఉండే ఉంటున్న ఖాళీ పదం

నీ ముఖంలోనే పదాలు మారతాయి
బానిస జీతం మాటల హక్కు సమాధిలోనే

ఇచ్చే చూపుల్లో ఓదార్పు
రాని మౌనంలో ఓదార్పు
నాలుకపై ఓదార్పు
న్యాయంలో ఓదార్పు
విసిరేసేవే

విభజించే న్యాయమే
రక్తం
హింస
స్మృతి

స్వప్నాస్థి నిజమే నా దేశ ద్రోహులలో
వెతికే రిమోట్ ఎవరికీ లేదు

పోతామో
[పోదామో}

నిద్ర
కల
తృప్తిలోని సుదూరాలు

ఆకలే
మరో
అక్షర సత్యమే

అబద్ధం

తీసేసే ఆకారాలే పదాలు
ఐనా మదం లేదు పదంలో

అందం శూన్యమే
నవ్వావా

ఎగరలేక

2011-09-05T21:18:00.000+05:30

అన్ని ఆలోచనలు అంతమయ్యాక
కొన్నే పదాలతో ఆలోచనల్ని రమ్మంటాను
వొస్తాయో రావో ఎవరికి తెలుస్తుంది

అందమైనవి అందంగా ఎపుడూ లేవు
అరుదైనవి అందంగానూ లేవు
అర్థమవ్వనివీ అందంగా లేవెందుకో

సొంతమయ్యే ప్రతిదీ ఎంతో బాధపెడతాయి
బాధపెట్టే ప్రతిదీ ఎప్పటికీ సొంతమవ్వదు
బాధించేవే అన్నీనూ

అన్ని మాటలూ అంతమయ్యాక
కొన్ని ఆలోచనలు మరికొన్నై
పదాల్ని పిట్టల్ని చేసి ఎగరేస్తున్నాయి

ఎవరి రెక్కలో
ఎవరి ఆకాశామో
ఎవరికి తెలియచెప్పాలి

స్వప్నాస్థి

2011-09-04T23:22:00.019+05:30

:: వెక్కిరింత ::

2011-09-01T13:07:00.000+05:30

అప్పటికే పెదాలపై కొన్ని వేల సంవత్సరాల రంగురంగుల పూలబుడగలు వాడి వాడున్నా
అప్పటికే వాసనేసే కొన్ని క్షణాల పదాల వాసనలు వాడి మాడి పడున్నా
అప్పటికే మరణించే కొన్ని కోట్ల ఊపిరి తీగలు నాని వాడి పాకకున్నా

అపుడెప్పుడో చేపనోట్లోని గాలిని తిని
అపుడెప్పుడో నీటి కంటిలోని వజ్రాల్ని దిగమింగి
అపుడెపుడో పిట్టకలలపై తిరిగే మబ్బుల్ని చెదరగొట్టి

అందుకేనా చేతుల్లోని సూర్యద్వారాల్ని మూసేస్తూ
అందుకేనా ముఖంలోని ఆకాశాల్ని చెరిపేస్తూ
అందుకేనా నేత్రాల్లోని సముద్రాల్ని కాల్చేస్తూ

తెరవకు తప్పిపోయే వాక్యాల్ని యీ పదాల్లో

స్వప్ననేత్రం

2011-08-30T16:15:00.003+05:30

అనుకూలమైన పదాలే
లేవు రెక్కలిప్పే సముద్ర పక్షి నేత్రంలో

చూస్తుందంతా రంగులు కలిసిన నీడలు
నీడలు కలిసిన రంగులే

తలవొంచే దుఃఖంలో ప్రేమెక్కడిది
దుఃఖంలో మనసు శిరస్సొంచే ప్రేమెక్కడిది

ఉబుకొచ్చే మౌనస్పర్శలు
నీత్రాశ్రువులు నేత్రాన్ని ఎపుడైనా ప్రశ్నించాయా

చెరిపేసిన మాటలన్నీ మాటల్తో
ఎక్కడికైనా చేరాయా

గళమొక నేత్రముఖ శూన్యమై
ఆవిష్కరించే నిశ్శబ్దాన్ని ఎవరు తిరిగి చెప్పగలరు

వొడిలిపోయే వొదులు పదాల్లో
అసంపూర్తి వాక్యాలెన్నో

సూర్యస్నేహ భూమిలో
స్వప్ననేత్రం ఎవరు చూడాలిలే

బూజు కలల్లో చిక్కుకొన్నాను

నిర్వృతి

2011-08-23T22:18:00.000+05:30

ప్రతి కారణమూ ఒక ఘటనే
సమాంతర పదాల్లోనే అన్వేషణ

తెనేతెర అద్దంలో ఉన్నాను
కన్నీళ్లు సీతాకోకచిలుకలు

ప్రతీదీ అనుమరణమేనా
కృంతాంతుడ్ని పరిహసించానా

ఏ నిలింపభాష కావాలి
ఒట్టి నాలుకతోనే ఉత్తుత్తునే

ఇది జరిగినిది కాదు
ఇది జరిగేదీ కాదు

కలల పోలికల్నే ఇంకా ఇంకా
డ్రీమిస్తూ డ్రియాలిటిస్తూ

నిర్వచనాలు
పదాల మధ్య ఇమడవు

నివీసు లేడిపుడు
ఎవరిక్ ఉత్తరమ్ రాయాల్

స్వాపమొక శాపము
వాక్యమొక నీటితాత

ఆపైన ఆలోన
ప్రతి ఘటనా అకారణమే

సగం ముసుగు చాలు నాకు
నన్నేను ముద్దుపెట్టుకుంటా

నవ్వే కన్నీటి బొట్టు
Sintax ని ఇపుడు ఎవరు వసూలు చేస్తారు

ఋజువు బూజులే అన్నీను
ముడివిప్పకు ముడ్డిచూపించు

---- మో గారికి ----

సగం విరిగిన విరామచిహ్నాలలోకి

2011-08-22T22:25:00.002+05:30

... కాకపొతే

కన్నీళ్లు వొస్తాయి

...కాలేకపోతే

విషమే చిమ్మే మౌనం వొస్తుంది

... సరే

ఎదురుపడకు ఓటమి నీడలతో

... ఇంకెందుకులే

ఎన్నాళ్ళు మృతలాభాల్ నష్టాల్

... ఐపోయిందా

ప్రతిసృష్టి

సృష్టి ప్రతి

... మిగిలిందా

నల్లటి ఒంటరి ఒంటేలు

... ఇక్కడే ఎక్కడున్నాం

నిన్నటి ఊపిరితో

వొచ్చేస్తున్నా...

సగం విరిగిన విరామచిహ్నాలలోకి

జ్ఞాపకం చేయకు

2011-08-22T10:52:00.002+05:30

మరణించాలనే ప్రతి అల ఒడ్డుకి చేరితే
ఎవరో బతకమని బలవంతంగా వెనక్కి లాక్కెలతారు

ఎప్పటిదో ఓ రాత్రి తన రాత్రిని అసహ్యించుకుంటుంది
కాలాన్ని అపహాస్యం చేయాలనేనా మృత్యువు రోదిస్తోంది

జరామరణాల మధ్య విరామం ఎంతో ఎవర్ని అడగాలి
అద్దంలోపల్లున్న మట్టిలో ఆడుకుంటున్నాను

వొంగిపోయానో లొంగిపోయానో ఇంకా దాగున్నానో
పరమపదించే పదమేలేని నిద్రలో ఆడుతున్నానో

గుండెల్లో ముళ్ళు పెరుగుతున్నాయి
కన్నీళ్లు గుచ్చుకునే మెత్తటి కొండలు

స్పర్శ స్పృహ
ఎంత ద్రోహం
ఎంత జ్ఞానం

విడిచిపెట్టే ప్రతిదీ అదృష్ట అదృశ్యం
జ్ఞాపకం చేయకు ప్రయాణించాలని

సమాధి ఎదురుచూస్తోంది

దీపాన్ని చూసే సమయం

2011-08-21T21:52:00.000+05:30

దీపం వెలుతురులో వెలిగే దీపాన్ని ఎప్పటికి చూస్తాను
చీకటిలో వెలగని దీపాన్ని చూసే సమయం ఎప్పుడు
జననమరణాలులేని వెలుతురో చీకటో ఎక్కడిపుడు

ఏ పదమో
పదమే ఏ పదమో
ఎటునుంచి వచ్చి పోతోంది

బహిష్కృత ఛాయలేవో
ప్రతి పుష్పంపై

వినిపించే ఖాళీ

2011-08-20T13:55:00.000+05:30

దూకాలి నిశ్శబ్దంలోకి
నిశ్శబ్దంగానే దూకాలి
ఏ జాడలూ లేకుండా

ఎప్పటి నేత్ర చిత్రకారుడో
రంగుల్ని కలుపుతుంటే
అవి కళ్లపై ఉండట్లేదు
గీసి చేసిన ఏ చిత్రమూ నిలవట్లేదు

ఓ సొంత సూర్యోదయం ప్రతి వస్తువులో
ఓ వింత మరణతేజం ప్రతి ప్రాణిలో

జ్ఞాపకాలు ఏ వర్ణంలో ఉంటాయి
కాలమే వర్ణరహితమైతే అపుడే రంగు అది

ఈ రంగుల్ని ఎవరు వింటారు
వింటున్న రంగుల్ని ఎవరు చూస్తారు

ప్రతీదీ
చూడబడేది చూడబడనిదేనా
చూడనిచ్చే చూసే చూపే లేకపోతే
జ్ఞాపకాలు ఎవరి నోటి రంగుల్లో ఉంటాయి
ఖాళీ అయ్యే ప్రదేశం ఏ రంగులో ఖాళీ అవుతోంది

వినిపించే ఖాళీ ఈ రంగులో ఎక్కడ

| తల ఎర |

2011-08-18T12:07:00.000+05:30

ఒకానొకసారి మెడపై తేలే తలలో కొన్ని ఆలోచనలు అడుగంటితే
అడుగునున్న తలతో ఆలోచనలు సంభాషించాలని పూనుకున్నాయి

ఈ తల నచ్చట్లేదు
ఈ మెడకి నాకు పడట్లేదు
ఈ ఆలోచనలు తలకెక్కట్లేదు
ఈ మాట్లాడే బుర్ర బూర ఎంతకీ పగలదు
ఏ చప్పుడూ చేయకుండానే నా చెవుల్ని కళ్ళని లొంగదీసుకుంటోంది
ఏ నాలుకుందో ఈ తలలో తెగ్గోసుకోవాలని చూస్తున్నా వీలుపడట్లేదు

ఎన్నో బానిస గొంతులతో
ఎన్నో అనుకరణలతో
మరెన్నో రుచులతో రోజూ రొంపి రొంపి చేస్తోంది ఈ తలకాయని

ఎక్కడికీ వెళ్ళదు పంపిద్దామంటే
అంటిపెట్టుకునే ఉంటోంది మెడకి అనుక్షణం
ఎలా వొదిలించుకోవాలి

ఇపుడే నీటిలో కడిగిన నీడలు
ఎండబెట్టాను ఎగిరేద్దామని
చనిపోయున్న కాగితంలో

ఏది తయారు చేసారో అది నిజమేనా
ఏది సృష్టించారో అదీ నిజమేనా
ఏది అంతరించిందో అదే నిజమా
ఏది నిజమో అది అంతరించాలా

ఇవేవీ కాదులే అని బొడ్డులేని ఆలోచనొకటి
తలతిక్క తలకి ఊరడింపు పలుకులేవో చెప్పుతుండగా...

చెప్పాపెట్టకుండా తల తలదిగి
తలతిరిగినట్టు కిందపడబోయి ఆలోచనల కళ్ళ కాళ్ళని పట్టుకోగా...

తలతిప్పి చూసిన ఆలోచనలు
కాళ్లు విదిలించుకొని పరిగెత్తాయి

తలకి దూరంగా ఆలోచనలు
ఆలోచనలకి దూరంగా తల
ఒకానొకసారి తలదాచుకుంటూ రాత్రిని తింటూ...

కలల తలలోకో
ఆలోచనల కలలోకో

గది చనిపోయింది

2011-08-17T10:07:00.006+05:30

చేరకపోవచ్చు
అద్దం వరకు కన్నీళ్ల నిద్ర.

మిగులుతున్న స్నేహితుల సంఖ్య
మిగలని రక్తసంబంధీకుల స్నేహం అర సున్న.

అవహేళనే
రహస్యం.

కూర్చున్న ప్రతి పదమూ అవహేళనే.

నిద్రరాదు
సూర్య జ్ఞాపకముంటే.

విరగలేని అక్షరాలు కళ్ళలోనే.
లోపల్లోపల లోపల లోపాల పాల అక్షరాలు.

భాషలో కాలం ఒక మరుగుజ్జు
మరుగుజ్జు కాలం ఒక భాష.

భక్తిపుష్పాలు
రతిభక్తిపుష్పాలు
భక్షించాలి భజించాలి

ఇక నాకలేను నా చర్మాన్నే
చర్మమే నన్ను నాకుతోంది

నల్లటి ఇల్లు
చెవులు లేని కళ్ళు

ఓడిపోవాలి
ఒంటరి నీడలకై
ఒంటరి మాటలకై
ఒంటరి మరణంకై

ఎవరోలే
ఈ కలలో తిరిగే పిట్టలు పిల్లలు స్త్రీలు మృగాలు

గది
చనిపోయింది

రాత్రీ
చనిపోయింది

పగలు
బతికే అవకాశాలు తక్కువే

మరో వాక్యాన్ని రాస్తున్నప్పుడు

2011-08-12T01:35:00.002+05:30

ఇదొక వేళ అని మాత్రమే తెలుసు
సమయాలు ఎవరో చూసుకుంటారు
ఎవరికీ ఎవరూ చెప్పలేరు చెప్పుకోలేరు ఈ స్థలంలోనే బతికున్నామని

ఒక ఆదివారమో, ఒక దినవారమో
దేహంతపువారమో, సదా రాత్రివారమో
గడిపేది బతికుంటేనే

వర్షమో సూర్యుడో
తడతారు స్త్రీకీ లేనటువంటి చేతులతో
గాలే ఆగుతుంది కళ్ళల్లో

ఖాళీ జిహ్వాలో
ఖాళీ నేత్రంలో
ఖాళీ మనసులో
ఎన్ని మాటలున్నా నన్ను చేరవు

వాసనో యాతనో
నీటిని తవ్వే దేహంలో
నిప్పుని పూడ్చే శవంలో

చేరుకోవాలి
చేదుకోవాలి
చనిపోకముందే బతకలేని క్షణాల్ని

చెట్లు నడిచే తోవలో
కొండలు పరిగెత్తే రహదారిలో
సముద్రాలు గెంతే గగనంలో
నేనూ నా ఆఖరి వాక్యం
సేదతీర్తాం

మమ్మల్ని కదపకండి
మరో వాక్యాన్ని రాస్తున్నప్పుడు

౦ జీరో ౦ జీరో

2011-08-09T07:41:00.002+05:30

కావలించుకున్న కవల కళ్ళల్లోని
కౌగిలింతంతా వృధానే

కూర్చున్న రోగి చీకటికి
నీకు, నాకు మాటలు ఎక్కడ్నుంచి వొస్తాయి

సంచరించే గర్భసంతోషం ఎవరిది
నవ్వటానికి ఒప్పందాలు ఎక్కడ

భయపడే చావు
చావుకి భయపడే మనం

శూన్య శోకం
శోకవిశ్రాంతి

ఆకాశం ఆకాశమే
సూర్యుడే సూర్యుడు కాదు

చెవులు బాధపడ్డాయి
బాగుపడ్డ కొన్ని కళ్ళని చూపించు

అద్దంలోపల సముద్ర కెరటాలు
ఈ రోజు అద్దాన్ని చూళ్ళేదు

౦ జీరో ౦ జీరో
నా చూపంతా
మాట్లాడు ౦ ౦ ౦లతో

నన్నే బతికున్నానా?

2011-08-06T16:55:00.003+05:30

సమాధానం
దానం
చేసారు
తీసుకునేది నేనేనా
నువ్వేనా

ప్రారంభం
అంతమైంది
ఎవరు ఆ మొదట ఆట చూసింది

అర్థమైంది
అంధత్వం
నా బయటికి చూపాలి లోపలని
నా బయటని లోపల చూపించాలి

నా లోపల బయట నన్నే కనిపిస్తున్నానే
అంధత్వం అర్థమెక్కడ

ఈ మూర్చ అక్షరాల్లో
నన్నే బతికున్నానా
నన్నే చనిపోయే ఉన్నానా

దేహించాలి నా దేహాన్నే

2011-08-01T14:50:00.000+05:30

నాతో దారితప్పి నడిచిన నీడల వెనక
నా నీడల వెనక దారితప్పి నడిచే నేను

ప్రార్ధించాలి నా ప్రార్ధననే
అభ్యర్ధించాలి నా అభ్యంత్రాల్నే
శోకించాలి నా శోకాల్నే
రమించాలి నా రతినే
దర్శించాలి నా దృష్టినే
స్ఫర్శించాలి నా స్పర్శనే
మరణించాలి నా మరణాన్నే
గాలించాలి నా గాలినే
అదృశ్యమవ్వాలి నా అదృశ్యంలోనే
ప్రేమించాలి నా ప్రేమనే
రుచించాలి నా రుచినే
నవ్వాలి నా నవ్వునే
దేహించాలి నా దేహాన్నే
శూన్యించాలి నా శూన్యంలోనే
కోపించాలి నా కోపాన్నే
చూడాలి నా చూపునే
బాధించాలి నా బాధనే
శరీరించాలి నా శరీరాన్నే
భాషించాలి నా భాషలోనే
చీకటించాలి నా చీకటిలోనే
నిద్రించాలి నా నిద్రలోనే

నా నీడల వెనక దారితప్పి నడిచాను

ఈ చోటైన

2011-07-29T23:46:00.002+05:30

మట్టి ఆకాశంలో
రెప్పల్లేని నక్షత్ర కెరటం
తొంగి చూసింది

ఎవర్నో కాదు
నన్నూనూ కాదు
నిన్నేనూ కాదు
దారుండని దేహశృతి
మేఘశాంతి తీరిన నాభి

ఇక్కడి బలహీన సూర్యుడే
నిన్నటి కాంతి మాంత్రికుడు

ప్రేమ ఎందుకు లేదో
ప్రేమకు చెప్పు
ఈ చోటైన

అందుకోవాలి

2011-07-29T20:36:00.002+05:30

ఎక్కడికి చేరాయో
గాలి ముత్యాలు

ఇంతలో-
నదిలోకి తొంగిచూసే మేఘపుష్పాల్ని
అందుకోవాలి

ఆకాశంలోకి తొంగిచూసే హరివిల్లు పెదవిని
అందుకోవాలి

కొండల్లోకి తొంగిచూసే చందమామ సిగ్గుని
అందుకోవాలి

తోటలోకి తొంగిచూసే సీతాకోకల పరిమళాల్ని
అందుకోవాలి

ఆమెకి చెప్పలేదు
ఇవాళ అందుకోవాల్సినివి ఎన్నో ఉన్నాయని

ఆమెకి చెప్పేవి
ఇవాళ ఎన్నున్నా చెప్పకపోతేనే నయం

గాలి ముత్యాలు
ఎక్కడో చేరాయి

కన్నొక hauntology

2011-07-27T11:49:00.004+05:30

అతనికీ తెలుసు
రాత్రి లేదని
దేహాలు నీటి పూల నవ్వని

ఆకాశం, అక్షరాలు తిరగబడ్డాయి అనర్ధంలో
అవో పిశాచాలు యోని నేత్రంతో

అతనికీ తెలుసు
ఊరేగే కలలు
చనిపోయే మంచు బిందువుల శిలలని

ఇది చూసే సమయం కాదు

ప్రతి చూపు

ఒక దేహమే

మరణం

ఒక చూపంత

ప్రేమ

ఒక మరణమంత

పిలవాలి

ఒకానొక చూపుని

వినాలి

ఒకానొక శూన్య నేత్ర ధ్వనిని

రుచిలేదు
ప్రతి చూపుకీ

ఎవరికీ ఉండనిది

2011-07-20T23:24:00.005+05:30

పిల్లలు
ప్రేమ
లేకుండా
ఉండాలి

స్త్రీ ఓ నలుపు సూర్యుడు
తెల్లటి మరుపు

లేదు
నాశనం
మృత్యువులో

స్నేహఊహే
ఓ మనసు

దేహం
ఎప్పటిదో
ఎవరికీ ఉండనిది

నీ నా పిల్లలు ఎక్కడ

ఎపుడు చూసానులే

అలా వొంగి వొంగి

2011-07-11T11:48:00.000+05:30

అలల రొమ్ములు
పీత చంద్రుడు
ఆగి వెళ్తుంటాయి చూస్తుంటే కదులుతుంటే
నిస్సిగ్గు సూర్యుడు అస్తమించేలోపే నీలో నక్షత్ర జిహ్వ
తాకకుండానే తాగకుండానే తరలిపోకుండానే

వినని
అనని
అవని
ఆవని

రంగులే
పొంగులే
తరలిన రుచి

మౌనాలు
శరీరాలు
ఈప్సితాలు
నక్షత్రాలు
అలా వొంగి వొంగి బయల్దేరాయి
చూస్తుంటే కదలకుంటే

సిగ్గులేని ఆకాశం కనిపించేలోపు
ఓ నీటి సూర్యుడు
మింగకుండానే మరచిపోకుండానే చనిపోకుండానే

వణుకు

2011-07-10T09:07:00.000+05:30

మహాప్రభో!

చూపు మందగించి
సూదిలోకి దారపు మాటల్ని
ఇటునుంచి అటు ఎక్కించలేక
పదాల్ని గుచ్చలేక

ఈ పూట కూడా నీకు విడి విడి
అక్షరాలతోనే నిన్ను అలంకరిస్తాను

బుద్ధి మందగించేలోపు
ఓ చిన్న దండైనా
నీకు అర్పించే శక్తినివ్వు

నీతో ఉండలేను

2011-07-04T21:12:00.003+05:30

అలసటతో
అల ఒడ్డుకి చేరలేక
అలలమధ్యలో తేలుతోంది

ప్రతిసారీ
ఈ మురికి తీరాన్ని తాకి మళ్లీ
మళ్లీ వెనెక్కే ఎందుకెళ్లాలి

ఏ చేపా నాతో స్నేహం చేయదే
ఏ పాపం చేసాను స్సముద్రమా!

సెలవు
కావాలి

నేత్ర గుహలోకి

2011-07-02T18:12:00.002+05:30

సముద్రం

ఒక ముదర ముద్ర

ఒక కుదరని ఊపిరి

నీరే

నీటి నోటిలోకి

నేత్ర గుహలోకి

ఏ దారిలోనో ఎడారి

ఎదురుపడితేనే జీవించే క్షణం

ఎడమయ్యే జీవితంలో మరణమే

బతికించే క్షణం

మృగాలు

మాటలు

గాలే లేని మాటలు గోడమీదకి

బతుకుమీదకి మట్టిలోకి

పాకుడు పాకుడు పదాలమీదే

నాలుకైనా నడకైనా

దారంలో దారం కన్ను

తెగ్గోసుకునే క్షణం

నీకు తెలిస్తే

సముద్రానికీ చేప్పే

తినాలని

2011-06-29T16:22:00.000+05:30

తనొంటిమీదున్న సూర్యుడ్ని
సూర్యుడు కిందకి దింపితే
చంద్రుడి కిందున్న సూర్యుడ్ని
చంద్రుడే తినాలని తనొంటినోరుని విప్పింది

ఎలా మలినమైందో నాకెందుకు

2011-06-22T21:08:00.000+05:30

ఒక దీపం పిలిచింది
తనని శుభ్రం చేయమని

నీ చేతులతో కాదు
కళ్ళతో
నా నల్లటి కాంతిని పరిశుభ్రంగా

చూస్తున్న దీపంలో దీపం ఎక్కడుంది
ఎలా మలినమైందో నాకెందుకు
ఎలా అందంగా తుడవాలో
ఈ కళ్లకి ఎప్పటికి చెప్పగలను

ముందు
ఈ కళ్ళనే శుభ్రం చేయాలి

దారి

2011-06-21T15:58:00.002+05:30

ఇక్కడికి

దారి దారి తప్పి రాలేదు
దారి దారీ లేక ఒచ్చాను

దూరం ఒక నిశ్శబ్ద నిశ్శబ్ద దర్పణం
అద్దంపై అద్దపు రోజులు లేవు

నిద్రించే నిద్ర నిద్ర దూరం ఎవరికి తెలుసు
తేలుతున్ననేల నేలలోకి వెళ్ళాలి

నీటి బొమికలు నిద్రలేచేలోగా
నేల గాలి గాలిలోకి ప్రయాణించాలి

తోటలోకి
స్మశాన తోటలోకి
సముద్ర వనంలోకి
దారి
దారి కావాలి.

దరికి చేరే దూరం
ఏ అలకి అలకి తెలుసు

నీ చేతిలోకి
ఏ చేతుల్నీ తీసుకోకు
ఆఖరికి నీ చేతుల్నీ

రాత్రిని రాత్రి చేయటానికి

2011-06-09T17:29:00.001+05:30

ఎవరికో
నా నీడని చూపాలి
విప్పేసిన ఉప్పటి వెలుతురుతో
~
ఎవరికీ
నీడనివ్వని యంత్రాలు
శ్వాస ఋతువుల్లోకి
~
ఎవరెవరికో
అనిశ్చిత జ్ఞాపకాలే రావని
నా దేహాన్నీ మర్చిపోయాను
~
ఏ పురాతన విగ్రహమో
నన్ను చూస్తున్న కంటిని విప్పాలనుకుంది
కన్నొక నాలుక
~
నకిలీ పిర్రల్తో
దేకుతూ వచ్చే మాటల్లో
తోలు బొమ్మల చంద్రుడు
~
ఎవర్నీ చూడని సూర్యుడు
చీకటిని తింటూ
తింటున్న ప్రశ్నలు
~
ఎవరు ఎవరు ఎవరు
స్మశాన సన్మాన ప్రేమలో
నా రాత్రిని రాత్రి చేయటానికి

గాలి కాయితంలో

2011-06-08T11:25:00.002+05:30

ఒక గాలి నిండిన కాయితాన్ని చించు
చించిన పదాలు కింద పడొచ్చు

చిరిగి పడిన పదాల్లోకి నీ కళ్ళని పంపు
వెతికే వెలితీ, వెలితిని కనుక్కునే వెలితీ కనిపించొచ్చు

మాట్లాడు కాయితపు నాలుకతో
పూర్తవ్వని అక్షరాలు పూర్తయ్యే అనాకార అక్కరాలు

అదే చీకటి మౌనం
అదే మౌన నిశీధి

చెవుల్ని ఎడంగా పెట్టు
కన్నీళ్ళనీ ఎడంగా పెట్టు

గాలిలేని గాలి కాయితాన్ని తీసుకో
నీ పదాలతో నింపు, చింపు

ఏమి చూసావో రాయి
నీ గాలి కాయితంలో

వింత విషం

2011-06-03T21:40:00.001+05:30

నీ చర్మం

చీకటిగా తడుస్తోంది
ఆవిరయ్యే ఆయువు
ఆగిపోయే చీకటి

నా చర్మం

తుడిచిన అక్షరం
పద మోసం
ఆరిన వాక్య కెరటం

మన చర్మం

వానలో పుట్టిన పరిమళం
పరవశించిన వయసు
కంటిరెప్పల సువాసన

నీటి పాదాలు
నా కన్నీళ్లు

వింత విషం
కాలం

.................తెల్లారదు

2011-06-01T08:21:00.005+05:30

.................తెల్లారదు. ఎన్నిసార్లు నిద్రించాలి ఒక ఆఖరి రాత్రిలోనే. రాత్రాంతంలోకి రాద్ధాంతం చేస్తూ వచ్చే నల్లటి గాలి మెడని వొదిలి వొచ్చేసే గడ్డిపరకలకి ఎవరు చెపుతారు ఆకాశం అభావమని. నా ముఖం నా చుట్టూ తిరిగేస్తుంటే, స్వదేహ వలసకై ఏ ప్రాంతాన్ని ఎంచుకుంటావు. నీ పాములు నీలో యెగిరి నీ కళ్ళల్లోంచి బైటికి అసలు వొస్తాయా. తెల్లారే ఆరే తెల్లటి ఎముకల్ని యేరుకోవాలి. ఏటిలోకీ ఎగిరించాలి. ప్రవహించాలి. నీ ముఖం నీ ముఖమయ్యేలోపే, కొట్టుకుపోవాలి, కొరుక్కుతినేసే కోతి హృదయంలో పురుగులు చేరాలి. రిహార్సలు చేయాలి చనిపోవాలంటే. గమనించు నీ ఆఖరి తేదీ ఏదో. ఎవర్నీ కనుక్కోకు. నీ భగవంతుడి వొంట్లో నిద్రపోయే నీ కన్నుల కన్నీళ్ళనీ అడగకు. నువ్వు దాచిపెట్టిన నీ వీధి ఏదో, ఏ తడిలేని మబ్బుకు చెపుతావు. పువ్వులోకి పాకే పువ్వులు, డబ్బుల్లోకి పాకే డబ్బులు, డోకుల్లోకి పాకే డోకులు, తిరస్కృతుల నేలలోకి పాకే తిరస్కృతులు. తెల్లారదు.......................

ఎవర్నీ పిలవకు

2011-05-31T08:32:00.003+05:30

ఏదీ........
నీ నిశ్శబ్దాన్ని వినిపించు

నీ నీడల్నీ మోసే
సూర్యుడ్ని చూపించు

నీ పదాల్లో దాగున్న
అక్షరాల్ని అలిఖించు

నీ నగ్న వాయువులో
పుష్పించే వృద్ధాప్యం

నీ సరికొత్త సమాధిలోకి
ఎవర్నీ పిలవకు

ఎవరి జ్ఞాపకాల్లోనో
బీటలేసిన నీ అద్దం

సజీవ స్వప్నాల్లోకి
నీ దారి నీకుందా

అహృది......

2011-05-28T12:32:00.001+05:30

ఆనందం, అనాకృతి, అశాంతి, అలజడి, ఆక్రందన, అహృది......
దగ్గరయ్యే తొడల చీకటి మధ్యలో
ప్రసవించలేని ఓ విరామ విన్నపం
స్మరించే ఫలం, దేహామృతం
మృత్యువు

ఈ యెర్ర ఎరని తినే నిద్రే చెప్పాలి
సంస్కార వియోగం

వాక్యం కింద సమాధి
సమాధి కింద వాక్యం

నిన్నటి కలలో పాచి ప్రేమికులు

దాగుడుమూతల
దాగుడుమూతుల కన్నీటి పదాలు

వాసనలు మనసులో

నీ నేత్రం నీదేనా

2011-05-27T08:29:00.002+05:30

ప్రతి వాసనొక పశ్చాతాపమే
నిరాటంక సమయంలో

ఏ నేత్రం ఎవరిదో
ఎవరికి తెలుసు

ఆగు
ఆగు ...అని పిలిచే మురికి కన్నీటిని
నలుదిక్కుల్లోంచి మోసుకొచ్చే మాటలే
బరువు నాలుకలోనూ

కదలని వాక్యమే సమాధి

కాలమానాల్లేని స్మశానం
ఎవరి దేహంలోనూ ఉండదు

కాస్త విడిపోవటానికే
శవపేటిక భాష

పేగుపోగుల్లో మంటలు
బతికుండే అంత్యక్రియలు

ఏ జ్ఞాపక స్థలంలోనో
సూర్యచంద్రులు

గుమికూడిన గుబుల్ని భుజాన్నెత్తుకుని
ఏ ఆకాశ తీరంలోకో నడవాలి

పొట్టి వీధులు

2011-05-27T08:24:00.002+05:30

చీకటినీ చూస్తాను
ఈ మాటలతో
అలసిపోయే చీకటితో

మరొక వాక్యం
కింద
మరొక చీకటి

ఒక నిశ్శబ్దం భయపెడుతోంది
కొంత పొడవుగా

పొట్టి వీధులు
ఆకాశంలో

పంటికింద చీకటిని
వెతికే
కళ్ళు కావాలి

పీతకళ్ళతో

2011-05-25T09:38:00.002+05:30

నీ నీడని విప్పు
ఐనా నీకు నువ్వు దూరం

మెరుస్తున్న అద్దపు డేరాల్లోంచి
పీతకళ్ళతో తిరుగు

ఏ దుఃఖమూ లేని అలలే
తీరాన్ని తాకుతాయి

నీ నిశ్శబ్దం నీ పడవ

నీ దేహాన్ని విప్పు
ఐనా నువ్వే దూరం నీకు

ఎందుకని అడక్కండి

2011-05-23T22:03:00.003+05:30

మిత్రులారా...
మీ నుంచి వెళ్లుతున్నది ఎందుకని అడక్కండి

అది దూరమవ్వనీ
అతి దగ్గరవ్వనీ
ఎక్కడికైనా బయల్దేరే చోటు లేకపోతే
తలదాచుకోటానికి ఏ మనిషీ లేని పరిసరాల్లో సంచరిస్తాను

ఇరుకిరుకు పట్టాలమధ్య పరుగెత్తుతున్న అనాలోచనలు
వేటిని మోసుకెళ్ళాలనుకున్నాయో
ఏ అంచుల్లేని తీరాల్ని తాకాలనుకున్నాయో
ఈ సూర్యరశ్మి పాదాల్ని వెంబడిన్చాలనుకున్నాయో
ఏ స్వప్న ప్రదోషాల్ని అనువదిన్చాలనుకున్నాయో
ఏ అక్షరం చెపుతుంది ఈ క్షణంలో
అంతరాంతరాల్లోంచి శ్వాస స్తంభాలు కూలిపోతుంటే

ఇక్కడ ఓటముల్లేవ్
కన్నీళ్ ల్లేవ్
అసలిక్కడ ఎవరు బతికారు

మిత్రులారా...
మీ నుంచి వెళ్లుతున్నది ఎందుకని అడక్కండి

ఆగర్భశోకితుడి లోకం కనిపిస్తోంది
చీకటి పడేలోగా చేరుకోవాలంటే
జ్ఞాపకాల సంచిని దారి మధ్యలో ప్రవహించే
శూన్య పదాల కెరటాల్లోకి గిరాటెయ్యాలి

ఇక సర్దుకోవాల్సిన సరంజామాని వెతకాలి

మిత్రులారా...
మీ నుంచి వెళ్లుతున్నది ఎందుకని అడక్కండి

రా...

2011-05-23T21:37:00.003+05:30

వాక్యం మారదు
మూత్రం మారింది

రెండు నాలుకలతో నడవలేను
నిన్ను ఏడుస్తాను

దొరకని పడవలు ఉంటాయి
నిద్రపోయే మసక నిశ్శబ్దంలో

నిన్ను ప్రతిపూటా
ప్రేమించటానికి రాలేను

శ్వాసొక విగ్రహం

అయినా కొన్ని నిస్సిగ్గు వాక్యాలతో
పదాల్ని చంపి వొస్తాను నిరాయుధుడ్నై

ఇక రా వెంటపడే
కాగుతున్న నీడలి జిమ్ముకుంటూ

ఇల్లు

2011-05-23T20:59:00.002+05:30

ఇల్లు పెద్దదవ్వదు
పిల్లలే మరీ పెద్దయ్యారు
రాగలిగిన వాళ్ళు వచ్చెళ్ళారు
కాలం పేరుకుపోయింది కళ్ళ పెంకులపై
ఇల్లొక శవపేటిక

ఇక ఎవరితో...

2011-05-15T18:10:00.004+05:30

పిట్టలకి పువ్వులకి అద్దాలు ఎవరిస్తారు

తుఫాను కంటిలోకి దూకే మెరుపులన్నీ తిరిగిరావా

అంతరిక్షంలో మనిషి మాంసపు ముద్దలు

పిడకలు పిడకలు పిడకలు పీడకలలో

వాక్యమొక నిశ్శబ్ద ప్రపంచం

మాటల దిండుని లాగకు

వ్యక్తావ్యక్తపు దుప్పటిని ఉతుకు

చావొక సున్న

ఈ పఠించే ముద్రలన్నీ ఎటుపోతాయి

విడుదలయ్యే జ్ఞాపకాలు ఇక ఎవరితో ఉంటాయి

నకిలీ నవ్వు

2011-05-11T21:43:00.004+05:30

పువ్వులపై
కొండ నీడ, నీ జ్ఞాపకం
=

నీ నీడ
ఎంతసేపు ఓ వానా
=

సూర్యుడా
నీ దువ్వెన ఎవరి జేబులో
=

నీ దూది కళ్లపై
ఎన్నో కలలు, ఎండాకాలం
=

వానలో నీ జుట్టు
చెరిగిపోదా సీతాకోకా
=

అక్షారలకీ, మ్రుత్యువుకీ
దూరం తెలిసేది కాయితపు కంటిలోనేనా
=

ఏదైనా సత్యం ఉండుంటే
విధ్వంసం అందులో ఉండును
=

నీడా
నీ ఇల్లెక్కడ
=

ముడతలుపడ్డ కనుపాపా
నీ ప్రేమ దైవమెక్కడ
=

ఓ నా మనసా, ముళ్లపందీ
నీ మాంసం రుచిగా ఉండునా

అద్దం

2011-05-10T21:55:00.002+05:30

చనిపోయే పిట్ట
ఎగురుతోంది
ఎవరి కంటిలో పడిందో

కన్నే ఎక్కడో
ఎగురుతోంది
ఎవరి చెవిలో పడిందో

ఇక రానని చెప్పే
పెదాలకై అద్దం
నోరుజాపుతోంది

ఓ తోపుగాడు

2011-05-08T10:54:00.002+05:30

మరికొన్ని మాటల్ని చీకట్లో ఉంచి, చీకట్లోంచి చిట్టెలుక అక్షరాల్ని నాలుకపై దిద్దుకొని, అటూ ఇటూ ఎగిరే కెరటాల కంటికంతిలోకి చుట్టుకుపోయే రేయింబవళ్ళనో , రేగుపళ్ళ నిద్రలోంచి బైటికి రాలేక, ఓ తోవా లేక, ఓ తోపుగాడు నీ పక్కనే, నాపక్కలో, పలకమీద అందపిండాలు, అండపిండాలు పెడుతుంటే, ఎవరి కళ్ళల్లోని కాలో, కలో మాటల్లోకి చేరి చెరిగిపోకుండా, దురదై, దూదై, ధూపమై దేకుతూ మరోచోటేదీ కానరాక, అక్షారాల్ని గోక్కుంటూ రంగురంగుల గులకోసం గుళ్ళస్నానంచేయాలి, ఉంచిన చీకటి మాటలతో.

చూడాలి

2011-05-07T20:06:00.003+05:30

కొంత. ఎంతోకొంత అంత తీరిక, దొరకనపుడు ఏడ్వాలి. మనుసుని ఓ మెత్తటి ఇసుక సూదితో పర పర కోయాలి చిరగకుండా. అపుడు కొంత రక్తం పోయాలి కంటిలోంచి తీసి. కన్నీళ్లే, పంటిలోపల నన్ను నముల్తూ. కొంతే, నమిలిన కళ్ళల్లోంచి చూడాలి.

మాటల మౌనం

2011-05-05T08:17:00.002+05:30

సన్నటి అక్షరాలపై లావుపాటి కాయితాలు
ఎవరు రాసిన పదాలో

అంత్యక్రియలు పూర్తికావు
~శ్వాస స్థలం భస్మం కాదు ~

ఆకారాలన్నీ సన్నని పాదాలపై మరుగుజ్జు పదాలు
ఎవరు ఎప్పటికి ఎక్కడికి చేరారో చేరాలో

అడుగులు అడుగుజాడలు ఆగడాలు అంతమవ్వవు
~జన్మస్వప్నం అందదు~

ఈ కుళ్లిన కాయితపు మెడలో
నా పక్కటెముకల్ని తొడుక్కున్నా

~పక్కకి రా, నీ కల నీకిచ్చేస్తా~
మాటల మౌనం ఏ ముసుగులో ఉందో

ప్రియుడా!

2011-05-04T10:08:00.002+05:30

కన్ను మొదలయ్యే స్థలం
నీ దగ్గరుంటే చెప్పు

అద్దం ఆక్రమించే నేత్రం
నీలో ఉంటే ఎవరికీ చూపకు

స్మశానంకి సాయంత్రమైంది
వాన సమయం ఎవరికో

నిప్పు ఉప్పటి గాలి
తేనేలేని ఎముకలు

మనసులోని చర్మానికి
పాడు దురద

పదం మొదలు నరికేస్తే
నాలుక ఇక పెరగదు

ప్రియుడా!
నీ రాత్రికి విరామసంకేతాలు ఎన్ని

నీలోకి

2011-04-26T08:43:00.004+05:30

ఈ ప్రాంతంలో వెళ్ళే పదాన్ని ఆపింది ఎవరైనా:
రాత్రి నా నిశ్శబ్దం

నీ రాత్రిలో తప్పిపోయిన నా రాత్రి ఎక్కడుంది:
పదాల కిందా మీదా

కాయితపు ఆకాశం లోపల:
ఎవర్ని తుడిచేయాలి, తడిచేయాలి

దొంగిలించే ఆకాశమే:
పిట్టలు పువ్వులు కన్నీళ్లు ఇక కనిపించవు

కానరానివాటికై:
నీలోకి చూడకూడదు

నోరు చాపు

2011-04-21T20:12:00.003+05:30

రాత్రి వలలో పడవ.
నాలుకనిండా కళ్ళు.
సూర్యుడిపై నిద్రించే పువ్వులు.
కొండ నవ్వే నది కలలో చందమామ లేదు.
ఎక్కడా లేని గదులు.
ఎవరికీ లేని గదుల గడులు.
గడవాలి.
గడపాలి.
కన్నీటి నాలుకలు.
నోరు చాపు, చావుని తీసుకుంటాను.

నా కలలో

2011-02-20T23:53:00.003+05:30

నీటి బొగ్గులపై
ఎన్ని అనుభవాలైనా కాలాల్సిందే.
---
ఏ దస్తూరీ లేని కళ్ళతో
చూడటమే ఒక భయం.
---
కాయితాలు నిండని అక్షరాలు
అద్దంలోపల తిరగాలని.
---
అతీత స్వప్నముఖాలన్నీ
నిశ్శబ్ద స్పర్శలే.
---
వాక్యంత హృదయమే
మరో చీకటి లేని నిద్ర.
---
అచ్చుతప్పులుండాలి
అద్దం నీ అద్దంలోకి తొంగిచూస్తే.
---
ప్రవేశించే వాక్యాలకై
నిష్క్రమించే పదాల ఎదురుచూపు.
---
ఎండిన నది నీడ
అక్షరాల్నిండా ధూళి ధూళి.
---
నా శరీరాన్ని
నా కలలో వెతుకుతున్నా.

కాలపు నేత్రమెక్కడ

2011-01-31T22:22:00.002+05:30

తలదాచుకున్న కన్నీళ్ళని
చెదరగొట్టకు
\
కారాగారపు రాత్రికేం తెలుసు
చంద్రుడి విన్యాసాలు
\
మూత్రిస్తున్న సూర్యుడికీ తెలియదు
స్వప్న ప్రేమలు
\
కూతురితో మాట్లాడే
తండ్రి మౌనమే అర్థమవ్వదు
\
నీళ్ళే కావాలా
కన్నీటి చూపుని శుభ్ర పరచాలంటే
\
ప్రతి దృష్టీ
ప్రమిద శ్వాసే
\
దేహం
మనసు
ఎప్పటికీ విలువలేనివే

.పాత నాలుకే..

2011-01-27T23:13:00.005+05:30

.ప్రతి మాటా అక్షరాలతోనే..
.ప్రతి అక్షరంలో సొంత కురుపు..
.పీచు వాక్యాలు..
.కాయితపు విన్యాసాలు..
.స్వప్నాంతర ద్వారాలు..
.దవ్వ అక్షరాలే చేరాయి మాటలై..
.అనుభూతి..
.అనుభవం..
.ఆనందం..
.ఎవరి అనువాదాలో..
.అక్షర చర్మంలో..
.పాత కథలే..
.పాత కళ్ళే..
.పాత నాలుకే..
.పాత కన్నీరే..

ఒక గౌహతి రాత్రి

2011-01-22T15:09:00.003+05:30

పనిరోజుల్లో చలి.
సరైన దుప్పటీ లేదు.
నిద్రెక్కడ.
___
రైలు కూత.
ఎవరి దూరమూ
ఎవరికీ తెలియనివ్వదు.
___
అనవసరమైన పదాలు.
పదాలతోనే అనువదించాలి.
___
హోటల్ తిండిలో
వెంట్రుక.
ఇంటికి ఎపుడెలతానో.
__
అప్పులే
సంవత్సరాల తరబడి
ఆదాయమే రోజుల్లో.
__
తీరిక లేదు.
నిను చేరే
మాటలూ లేవు.
__
ఇది ఏ రాత్రి.
రాత్రైతే రాత్రికీ తెలియదు.
హాజరు పట్టిక ఎక్కడుంది.
__
ఆహారం, ఆహ్లాదం
పొందటానికి
ఎంత అహంకారం కావాలి.

దాటాలి

2011-01-21T07:15:00.002+05:30

ఏది చూస్తామో
అది
అదే రాయలేని వాళ్ళం

ఏ స్వరమూలేని పదాలతో
అక్షరాలు శబ్దిస్తే సరిపోతుందా

ప్రతి అక్షరంలోపల
శూన్య జ్వాల

తిరగేసినా
తిరగారాసినా
అక్షరంతో ఏదీ చూడలేము

దాచుకునే కంటికి
పదాలు ఉండవు

వాక్యాలమధ్య నడవటానికి
కొన్ని మాటల దారులు సరిపోవు

నిద్రలోకి దారి చేసి
నిద్రకీ దారి చూపి
ఎవరు నిద్రిస్తారు

దాటాలి
పదాలలోంచి

కౌసు

2011-01-17T21:44:00.004+05:30

సన్నటి వస్తువు
పల్చటి బరువు
దేహాంగి కాదులే

ఎంపిక లేదు
రాత్రికీ
పగటికీ

పొన్నంగి
దిశ ఏది

దేహయాత్ర
లేదులే

నిర్మోకముతో
తిరగాలి

బొందితోనే
ఎవర్ని పలకరించాలి

నా నన్నుతో
ఎప్పటికి మాట్లాడతాను

ఏదీ రాయనపుడు

2011-01-15T20:20:00.000+05:30

ఏదీ రాయనపుడు ఏదో ఆలోచించాను.
చేతుల్లోకి చేరని అన్నం మెతుకుల కోసమేనా.
కళ్ళల్లోకి తొంగిచూసే చావు కోసమేనా.

ఏదో ఆలోచించాను ఏదీ కనిపించనపుడు.
బిడ్డలున్న గాలిపటమై.
గోళీలు బిడ్డల్ని పెట్టినట్టు.

ఏదీ రాయనపుడు
ఏదీ లేదు.

అబద్ధాలు కావాలి.
నిజమైన అబద్ధాలు కావాలి.

ఊబి

2011-01-09T09:06:00.002+05:30

నీటి నాలుకని తవ్వుకోవాలి

నదిలోపల ఇసుక పువ్వులు

చుట్టబెట్టే వరకు

మాటల వలయాల

ఊబి ఎంత

గూడుకట్టలేని సాలీడులోకి

నడిచే కళ్ళతో వెంబడించాలి

అనుమతి ఉండని నిద్రకి

నిద్రించే దేహం ఎందుకు

కాలపు నకలు ఎక్కడ

నాలుకలోకి సూర్యుడు

రాత్రి మధ్యలోని నది

నదిలోకి మునిగిపోయింది

పారిపోయే గాలే

అనాధ

తవ్వుకోవాలి నాలుక నీటిని

నీడలనీడ

2010-12-27T10:32:00.001+05:30

తాళంలేని తాళపత్రాల్లో అనేక తొనల ఫెళఫెళల గొంతుల భాషని ఎవరు విన్నారో. విరుగుతోన్న నాలుకపై చెదల నాలుకలు. అక్షరాలతో భక్షించిన సత్యమంతా తలతలల కల్పితమేనా. చింపిరి మాటల దాగుడుమూతల్లో రంగురంగుల రక్తం. విస్తరించని నేత్ర మౌనం. దోచుకోలేని అనాది పరిమళాల సృష్టి. నిలవనీడలేని గతం. తాకిన ప్రతీదీ ఒక చల్లటి స్వగతం. అడ్డుగోడలు తునాతునకలయ్యే తలక్రిందులయ్యే శరీరంతో ఉన్నానేమో. తారట్లాడే నిగనిగల తారల తడి పాదాలు బురద ఆకాశంలో మెత్తటి ముత్యాలు. మారుతాళాలులేని సూర్యుడు ఏ వాక్యంలోనో చంద్రవంకై. నువ్వు ముట్టుకునే రొమ్ముల్లా. ఇబ్బడిముబ్బడి నగ్ననటనలు పాదాల మధ్య కునుకు కుంకుం చెరుపుకుంటూ అనాక్రందనతో. కలవని కళ్ళతో భీతిల్లిన నిరీక్షణతో వీర్య శాంతి. విధేయ దేహం విరోధే. ఎవరి దయో కనికరించే ప్రతి శ్వాస తలారికి. జరుగు జరుగు జరుగుబాటు లేనోడ్ని. తాళం లేని ఆకలి మబ్బుల్లో అనేక నీడల నీడలు.

సగం అద్దం

2010-12-18T20:58:00.005+05:30

నా అద్దంలో
కొన్ని భూకంపాలు ఉన్నాయి.
ఏదీ విరిగిపడదు.
పగలదు.
ఒరగదు.

నా అద్దంలోంచి నీ అద్దంలోకి
చూస్తాను.
పగిలిపోతాను.

ఈ అద్దాల దూరం ఎంత.
దూరమైన అద్దాలతో ఎవరు చూస్తారు.

నీటి సాలీడొకటి అద్దం లోపల
లోపల కూర్చుని నా వంక చూడక
నీ అద్దం లోపలున్న పదాల కలలకై నిద్రిస్తోంది నిలబడి.

నేనొక అద్దమైతే
నాలుకతో ఎవర్ని వెక్కిరించాలి
కన్నీటి సూర్యుడినా?

నీడలు

2010-12-05T21:27:00.001+05:30

ఎవరి నీడో నాలుకపై
ఆనందంతో లేదు
నోరుమూసుకోలేకున్నాను

ఎండిన ఆకుపై నీడ
ఏ చెట్టుదో
ఎప్పటికి తెలిసేది

కొన్ని నీడలు తియ్యగా చేదుగా
నల్లటి మాటల్లోని నీడలే
ఎప్పటికీ రుచీ పచీ లేకుండా

ఎగురుతున్న నీడల్లోకి
స్మశాన బూడిద తోడైంది
ధన్యులు

నీడలని
కుట్టుయంత్రంలోకి ఎన్నిటిని పంపినా
అవి చిరిగే వస్తున్నాయి

ఏడుస్తున్నప్పుడు
ఏ కంటితో చూస్తాము
ఎక్కడ చూస్తాము

ఉత్తరాలు ఉత్తరంనుంచి రావు
ఉత్త ఉపయోగమేదీ లేని ఉత్తిత్తి గాలి
కొన్ని ప్రతిబింబాల్ని ఎక్కడికీ చేరవేయదు

నీడలతో నీడల్ని తయారు చేయొచ్చు
నిశ్శబ్దంతో నిశ్శబ్దం ఎవరు తయారు చేస్తారు
తయారయ్యే నిశ్శబ్దాల వెంట ఎవరైనా వెళ్ళరా

చూడని అద్దంకై

2010-12-04T19:37:00.000+05:30

ఆకాశం
మేఘాల్ని మార్చుకుంటోంది.
పువ్వులు ఆకాశాన్ని మార్చుతున్నాయి.

...

నిద్ర పైన నిద్ర
నిన్నటి నిద్రలోకి నిద్ర
నిదురించు నిద్ర లేదు

..

గాడి తప్పని మాటలు
గడ్డితో కప్పిన మాటలు
తెగులు నాలుకకి వైద్యుడు రాడు

..

రాని చంద్రుడి కోసమే
రాత్రంతా నక్షత్రాల రొద
పిట్టల కలలు చెదిరాయి

..

రైలు పట్టాలని
అడివి చూస్తోంది
ఏ ఊరూ చేరువలో లేదు

..

నిన్నే కలుసుకోవాలని
అడవి దాటాను
నిన్ను కలవకుండా ఉండాల్సింది

..

చర్మాన్ని దానం చేయాలి
ముసలి అద్దమే
అడ్డమొస్తోంది

..

చీకటి రాదు
అద్దంలో చూస్తుంటే
చూస్తున్న అద్దం, చీకటీ ఒకటేనా

వాన మొక్క

2010-11-30T08:52:00.009+05:30

అనుకోవాలి.

రేగుపండు గాలి వాసనకి
వేపపూత మబ్బుల వాసనకీ మధ్య.

ఒక పాత కంటిలో కొన్నే కనులు.

పాటలు పాడిన కళ్ళతో

జ్ఞాపకాలకై ఎదురు చూడాలి.

అనుకున్నా. కళ్ళు ఎంతో పాతవని.

పూలూ పాతవే.

మాటల్లోని మాట్లాడని మాటలూ పాతవే.

అనుకోకుండా.

శరీర అస్పష్టతతో

ఇక్కడ ఏదీ జరిగినట్టు ఉండకూడదు.

చల్లటి కాంతి కావాలి

ఎవర్నో చూసేందుకు.

అపవిత్రతతో నవ్వుకోవాలి

పవిత్రతతో ఏడవాలి.

అనిపిస్తేనే.

సెలవులు లేని కొండల నుంచి
విశ్రాంతి లేని మేఘాల నుంచి
జీవించే మృత్యువు నుంచి దాక్కోవాలి.

గాలీ
ఉన్మాదే.

మారుతున్న నిన్నటి నీళ్ళపై
గూడు వొదిలి రాగలిగే నీరు ఏది.

కంటిలో పెరుగుతున్న నాచు పూలు.
హృదయం ఎండిపోయే వాన మొక్క.

ఓ సీతాకోకా!
నీ మనసు నీకన్నాఎంత బరువు?

ఎం. ఎస్. నాయుడు

లోలోపల

నా లోపలి కుక్క నిద్రపోయింది

a fake dream

ఆత్మహత్య చేయాలి

నా వంతు

చనిపోయే క్షణాల్లోకి

ఆకులపై ఆకాశం

ఓ సుఖవాంఛ

అతృప్తి

చెత్త కుండీ నాలుక

జీవితం దేన్నీ ప్రేమించదు

చీకటి హరివిల్లు

నా లోపల నీకై

భవిష్యత్తులేని వ్యాకరణం

సొంత చీకటి

చూడకు

((( మీది కాదులే )))

~~~ఇంకా పూర్తికాలేదు~~~

నన్ను తీసుకెళ్ళు

ఎలుక నాలుక

ఒక మనిషి... మరో పిట్టా... ఇంకో చెట్టూ

జాలరి

కలల్ని కడగాలి

లోహానందం

ప్రతిబింబంలో అద్దం

చేరావా నీలోకైనా

మాయా సమయం

అద్దం ~ కిటికీ

మౌనంలోకి అరవాలి

డిస్కౌంట్లో అంత్యక్రియలు

నకిలీ సమాచారం

మనసు

స్నేహితుని స్థలం

తలిదండ్రులులేని స్వప్నాలు

ఉయ్యాల నీడల్లో

పుల్లటి నిశ్శబ్దం

బాహ్య అంతర్మధనం

ఈ కవితకి అనువాదం మీ నుంచి కోరుతున్నాను. సహకరిస్తారా?

చల్లటి రంగు నల్లన

లేదు

ఎగరలేక

స్వప్నాస్థి

:: వెక్కిరింత ::

స్వప్ననేత్రం

నిర్వృతి

సగం విరిగిన విరామచిహ్నాలలోకి

జ్ఞాపకం చేయకు

దీపాన్ని చూసే సమయం

వినిపించే ఖాళీ

| తల ఎర |

గది చనిపోయింది

మరో వాక్యాన్ని రాస్తున్నప్పుడు

౦ జీరో ౦ జీరో

నన్నే బతికున్నానా?

దేహించాలి నా దేహాన్నే

ఈ చోటైన

అందుకోవాలి

కన్నొక hauntology

ఎవరికీ ఉండనిది

అలా వొంగి వొంగి

వణుకు

నీతో ఉండలేను

నేత్ర గుహలోకి

తినాలని

ఎలా మలినమైందో నాకెందుకు

దారి

రాత్రిని రాత్రి చేయటానికి

గాలి కాయితంలో

వింత విషం

.................తెల్లారదు

ఎవర్నీ పిలవకు

అహృది......

నీ నేత్రం నీదేనా

పొట్టి వీధులు

పీతకళ్ళతో

ఎందుకని అడక్కండి

రా...

ఇల్లు

ఇక ఎవరితో...

~ఇంకా పూర్తికాలేదు~

చూడాలి