తినాలని

తనొంటిమీదున్న సూర్యుడ్ని
సూర్యుడు కిందకి దింపితే
చంద్రుడి కిందున్న సూర్యుడ్ని
చంద్రుడే తినాలని తనొంటినోరుని విప్పింది

ఎలా మలినమైందో నాకెందుకు

ఒక దీపం పిలిచింది
తనని శుభ్రం చేయమని

నీ చేతులతో కాదు
కళ్ళతో
నా నల్లటి కాంతిని పరిశుభ్రంగా

చూస్తున్న దీపంలో దీపం ఎక్కడుంది
ఎలా మలినమైందో నాకెందుకు
ఎలా అందంగా తుడవాలో
ఈ కళ్లకి ఎప్పటికి చెప్పగలను

ముందు
ఈ కళ్ళనే శుభ్రం చేయాలి

దారి

ఇక్కడికి

దారి దారి తప్పి రాలేదు
దారి దారీ లేక ఒచ్చాను

దూరం ఒక నిశ్శబ్ద నిశ్శబ్ద దర్పణం
అద్దంపై అద్దపు రోజులు లేవు

నిద్రించే నిద్ర నిద్ర దూరం ఎవరికి తెలుసు
తేలుతున్ననేల నేలలోకి వెళ్ళాలి

నీటి బొమికలు నిద్రలేచేలోగా
నేల గాలి గాలిలోకి ప్రయాణించాలి

తోటలోకి
స్మశాన తోటలోకి
సముద్ర వనంలోకి
దారి
దారి కావాలి.

దరికి చేరే దూరం
ఏ అలకి అలకి తెలుసు

నీ చేతిలోకి
ఏ చేతుల్నీ తీసుకోకు
ఆఖరికి నీ చేతుల్నీ

రాత్రిని రాత్రి చేయటానికి

ఎవరికో
నా నీడని చూపాలి
విప్పేసిన ఉప్పటి వెలుతురుతో
~
ఎవరికీ
నీడనివ్వని యంత్రాలు
శ్వాస ఋతువుల్లోకి
~
ఎవరెవరికో
అనిశ్చిత జ్ఞాపకాలే రావని
నా దేహాన్నీ మర్చిపోయాను
~
ఏ పురాతన విగ్రహమో
నన్ను చూస్తున్న కంటిని విప్పాలనుకుంది
కన్నొక నాలుక
~
నకిలీ పిర్రల్తో
దేకుతూ వచ్చే మాటల్లో
తోలు బొమ్మల చంద్రుడు
~
ఎవర్నీ చూడని సూర్యుడు
చీకటిని తింటూ
తింటున్న ప్రశ్నలు
~
ఎవరు ఎవరు ఎవరు
స్మశాన సన్మాన ప్రేమలో
నా రాత్రిని రాత్రి చేయటానికి

గాలి కాయితంలో

ఒక గాలి నిండిన కాయితాన్ని చించు
చించిన పదాలు కింద పడొచ్చు

చిరిగి పడిన పదాల్లోకి నీ కళ్ళని పంపు
వెతికే వెలితీ, వెలితిని కనుక్కునే వెలితీ కనిపించొచ్చు

మాట్లాడు కాయితపు నాలుకతో
పూర్తవ్వని అక్షరాలు పూర్తయ్యే అనాకార అక్కరాలు

అదే చీకటి మౌనం
అదే మౌన నిశీధి

చెవుల్ని ఎడంగా పెట్టు
కన్నీళ్ళనీ ఎడంగా పెట్టు

గాలిలేని గాలి కాయితాన్ని తీసుకో
నీ పదాలతో నింపు, చింపు

ఏమి చూసావో రాయి
నీ గాలి కాయితంలో

వింత విషం

నీ చర్మం

చీకటిగా తడుస్తోంది
ఆవిరయ్యే ఆయువు
ఆగిపోయే చీకటి

నా చర్మం

తుడిచిన అక్షరం
పద మోసం
ఆరిన వాక్య కెరటం

మన చర్మం

వానలో పుట్టిన పరిమళం
పరవశించిన వయసు
కంటిరెప్పల సువాసన

నీటి పాదాలు
నా కన్నీళ్లు

వింత విషం
కాలం

.................తెల్లారదు

.................తెల్లారదు. ఎన్నిసార్లు నిద్రించాలి ఒక ఆఖరి రాత్రిలోనే. రాత్రాంతంలోకి రాద్ధాంతం చేస్తూ వచ్చే నల్లటి గాలి మెడని వొదిలి వొచ్చేసే గడ్డిపరకలకి ఎవరు చెపుతారు ఆకాశం అభావమని. నా ముఖం నా చుట్టూ తిరిగేస్తుంటే, స్వదేహ వలసకై ఏ ప్రాంతాన్ని ఎంచుకుంటావు. నీ పాములు నీలో యెగిరి నీ కళ్ళల్లోంచి బైటికి అసలు వొస్తాయా. తెల్లారే ఆరే తెల్లటి ఎముకల్ని యేరుకోవాలి. ఏటిలోకీ ఎగిరించాలి. ప్రవహించాలి. నీ ముఖం నీ ముఖమయ్యేలోపే, కొట్టుకుపోవాలి, కొరుక్కుతినేసే కోతి హృదయంలో పురుగులు చేరాలి. రిహార్సలు చేయాలి చనిపోవాలంటే. గమనించు నీ ఆఖరి తేదీ ఏదో. ఎవర్నీ కనుక్కోకు. నీ భగవంతుడి వొంట్లో నిద్రపోయే నీ కన్నుల కన్నీళ్ళనీ అడగకు. నువ్వు దాచిపెట్టిన నీ వీధి ఏదో, ఏ తడిలేని మబ్బుకు చెపుతావు. పువ్వులోకి పాకే పువ్వులు, డబ్బుల్లోకి పాకే డబ్బులు, డోకుల్లోకి పాకే డోకులు, తిరస్కృతుల నేలలోకి పాకే తిరస్కృతులు. తెల్లారదు.......................